बैतडीको दोगडाकेदार गाउँपालिका–कतोला चडेपानीकी १७ वर्षीया भागरथी भट्टको हत्या प्रकरणको अनुसन्धानका लागि प्रदेश प्रहरी कार्यालय सुदूरपश्चिमका एसएसपीसहितको टोली घटनास्थलमा पुगेको छ ।
जिल्ला प्रहरी कार्यालय बैतडीसहितको टोलीले अनुसन्धान गरिरहेका अवस्थामा थप सहयोगको लागि एसएसपी जनक पाण्डे नेतृत्वको टोली घटनास्थलमा पुगेको प्रदेश प्रहरी कार्यालय सुदूरपश्चिमका प्रवक्ता एसएसपी मुकेश  सिंहले बताए ।

‘यसभन्दा अगाडि कुकुरसहितको टोली अनुसन्धानको लागि गएको थियो । थप अनुसन्धानको लागि एसएसपी साबको टोली पनि गएको हो,’ एसएसपी सिंहले लोकान्तरसँग भने,‘केन्द्रीय अनुसन्धान ब्यूरो (सीआईबी) को टोलीले पनि अनुसन्धान गरिरहेको छ ।’

 अहिले घटनाको अनुसन्धानका लागि सीआईबीको टोली, प्रमुख जिल्ला अधिकारी (सीडीओ), सरकारी वकिलको कार्यालयका प्रमुख, जिल्ला प्रहरी कार्यालयका बैतडीका प्रमुख र प्रदेश प्रहरी कार्यालयका एसएसपीको टोली अनुसन्धानमा खटिएको छ ।

एसएसपी सिंहका अनुसार अहिले प्रहरीले मृतक भागरथीका आफन्त र साथीहरुलाई सोधपुछ गरिरहेको छ । उनको पोष्टमार्टम भइसकेको र भोलि (आइतवार) रिपोर्ट आउने सिंहले बताए ।
‘लबलेक सामुदायिक वनमा उनको शव भेटिएकाले कसले हत्या गरेको हो वा बलात्कारपछि हत्या भएको भन्न सकिँदैन, भोलि रिपोर्ट आएपछि मात्र अन्य तथ्य खुल्ला,’ एसएसपी सिंहले लोकान्तरसँग भने ।
जिल्ला प्रहरी कार्यलय बैतडीका प्रवक्ता जनक बहादुर धामीका अनुसार भागरथी विद्यालय आउने–जाने सडकमा हिँड्ने ट्याक्टर चालक र अन्य व्यक्तिहरुसँग सोधपुछ भइरहेको छ ।

बुधवार घरबाट विद्यालय गएकी किशोरी भट्ट साँझसम्म घर नफर्केपछि खोजी गर्दै जाँदा बिहीवार साँझ ५ बजेतिर हत्या गरि फालिएको अवस्थामा शव नजिकैको लबलेक सामुदायिक वनमा फेला परेको थियो ।
अनुसन्धानमा खटिएका प्रहरीका अनुसार सडकबाट झण्डै ५० मिटर तल झाडीमा भेटिएकी भागरथीको टोउकोमा चोट लागेको छ ।

‘घाँटीमा थिचेर हत्या गरेको जस्तो देखिने मार्क पनि छ हातमा कोतरिएको देखिन्छ,‘ ती प्रहरी अधिकारीले लोकान्तरसँग भने, ‘यौनाङ्गमा रगत बगेकाले बलात्कारपछि हत्या भएको हो कि भन्ने अनुमान लगाउन सकिन्छ, तर पोस्टमार्टमपछि सबै रिर्पोट बाहिर आउला ।’