भारतमा दिनको तीन लाखभन्दा बढी कोरोनाभाइरसका केस अनि दुई हजारभन्दा बढी मृत्यु भइरहँदा राजधानी दिल्ली सबभन्दा बढी संक्रमित शहर बनेको छ । 

दिल्लीमा कोभिडको स्थिति भयावह हुनाले लाश जलाउने ठाउँ नपाएर नगरपालिकाका अधिकारीहरू कार पार्किङ गर्ने ठाउँमा शवदहन गरिरहेका छन् । 

यसैबीच दिल्लीको अशोका होटललाई कोभिड केयर सेन्टर बनाइएको छ । त्यहाँ दिल्ली उच्च अदालतका न्यायाधीश र तिनाका परिवारलाई राखिएको छ । 

शहरमा मानिसले शय्या र स्वास्थ्य सामग्री नपाइरहेको बेलामा न्यायाधीशहरूलाई भीभीआईपी सेवासुविधा दिएको भन्दै मुख्यमन्त्री अरविन्द केजरीवालको आलोचना भएको छ । 

दिल्लीका निवासीहरूले संक्रमित सर्वसाधारण सडकमा पल्टिरहेको अनि न्यायाधीशहरू मोजमस्ती गरिरहेको भन्दै आलोचना गरेका छन् । 

उक्त विलासी होटलमा सयवटा कोठा दिल्लीका न्यायाधीशका लागि छुट्ट्याइएको छ । दिल्लीको प्राइमस अस्पतालले होटल अशोकामा कोभिडविरुद्धको स्वास्थ्य सेवा उपलब्ध गराउनेछ ।