१६ असार २०८३, मंगलबार
कोरोना संक्रमणको दोस्रो लहर चलिरहेकोमा विज्ञहरूले तेस्रो लहर आउन सक्ने चेतावनी दिएका छन् ।
भारतको केन्द्र सरकारका प्रमुख वैज्ञानिक सल्लाहकार प्राध्यापक विजय राघवनले दोस्रो लहरपछि तेस्रो लहर पनि आउने बताए ।
पत्रकार सम्मेलन गर्दै उनले भने, ‘तेस्रो लहर पनि आउँछ । तर कहिले आउँछ र कति खतरनाक छ भन्ने कुरा अहिले नै भन्न सकिन्न । कोरोनाभाइरसको भेरिएन्ट लगातार परिवर्तन भइरहेको छ । त्यसैले तेस्रो लहरका लागि तयार भएर बस्नुपर्नेछ ।’
खोपहरू प्रभावकारी रहेको तर वैज्ञानिकहरू त्यसलाई अप्ग्रेड गर्न लागिपरेको उनले बताए ।
तेस्रो लहर कहिलेसम्म आउला भन्ने बारेमा बेंगलुरुस्थित इन्डियन इन्स्टिच्युट अफ पब्लिक हेल्थमा महामारी विशेषज्ञ डा गिरिधर बाबू भन्छन्, ‘जाडो महिनामा आउन सक्छ । नोभेम्बरको अन्त्य वा डिसेम्बरको आरम्भमा । त्यसैले
संक्रमणको जोखिम भएकाहरूले सकेसम्म छिटो खोप लगाइहाल्नुपर्छ ।’
डा गिरिधर नेसनल कोभिड टास्कफोर्सका सदस्य तथा सल्लाहकार पनि हुन् । तेस्रो लहरले युवावर्गलाई बढी प्रभावित पार्ने उनको भनाइ छ ।
