चितवनकी सुजिता भण्डारीको मृत्यु प्रकरण झन् रहस्यमय बन्दै गएको छ । पोष्टमार्टम रिपोर्टले चोटपटकबाट मृत्यु भएको नदेखिएपछि अझ यो घटना पेचिलो बन्दै गएको हो । 

राप्ती नगरपालिका–३ की सुजिताको शव पोष्टमार्टमका लागि काठमाडौं ल्याइएको थियो । पोष्टमार्टम रिपोर्टबाट पनि मृत्युको कारण स्पष्ट हुन नसकेपछि भिसेरा परीक्षण गर्ने तयारी गरिएको छ । 

‘पोष्टमार्टम रिपोर्ट हामीसँग आइपुगेको छैन, तर भिसेरा परीक्षणको तयारी भइरहेको जानकारी पाएका छौं,’ चितवनका प्रहरी प्रवक्ता डीएसपी सूर्यबहादुर थापाले भने। 

पोष्टमार्टमबाट मृत्युको कारण स्पष्ट नभएपछि भिसेरा परीक्षण गरिन्छ । ‘चोटपटकबाट मृत्यु भएको हो वा होइन भनेर पोष्टमार्टम रिपोर्टबाट थाहा हुन्छ,’ डीएसपी थापाले भने, ‘विषजन्य केही खाएर मृत्यु भएको हो वा होइन भनेर भिसेरा परीक्षण गरिन्छ ।’ 

असार ११ गतेदेखि बेपत्ता भएकी सुजिताको शव ९ दिनपछि ब्रह्मास्थानी सामुदायिक वनमा फेला परेको थियो । परिवारले भण्डारीको अपहरण भएको भन्दै प्रहरीमा उजुरी दिएका थिए । 

सुजिताको हत्याको भएको र दोषीलाई कारबाही गर्न माग गर्दै चितवनमा प्रदर्शन भइरहेको छ । प्रहरी र प्रदशर्नकारीबीच झडप भएपछि राप्ती नगरपालिकामा कर्फ्यू पनि लगाइएको छ । 

यद्यपि कर्फ्यू लगाइएको क्षेत्रभन्दा बाहिर एक–ठाउँमा प्रदर्शन जारी नै रहेको डीएसपी थापाको भनाइ छ ।