नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपा एमालेका नेता माधवकुमार नेपालबीच बिहीवार १ घण्टा लामो कुराकानी भएको छ ।

नेता नेपालको निवास कोटेश्वरमा २ नेताबीच शेरबहादुर देउवाको नेतृत्वको सरकारलाई विश्वासको मत दिने विषयमा छलफल भएको स्रोतको दाबी छ ।

देउवाले बुधवार मात्र नेता नेपालसँग भेटेर विश्वासको मत दिन आग्रह गरेका थिए । 

प्रचण्ड र नेपालबीच देउवाको सरकारलाई विश्वासको मत दिलाएर संसदलाई पूरा कार्यकाल चलाउने विषयमा छलफल भएको माओवादी स्रोतले बतायो । 

प्रचण्डले सरकार सञ्चालनका लागि उच्चस्तरीय संयन्त्र बनाएर त्यसमा सहभागी हुन नेपालसँग प्रस्ताव गरेका छन् । 

प्रचण्ड र नेपालसँगको भेटअघि कोटेश्वरमा नेकपा महासचिव नेत्रविक्रम चन्द ‘विप्लव’ सहितको छलफल भएको थियो ।