माधव नेपालसहित १४ जना सांसदमाथि गरिएको कारवाही अगाडि बढाउन माग गर्दै नेकपा एमालेका सांसदले कार्यकक्षमा धर्ना दिएपछि सभामुख अग्नि सापकोटा शुक्रवार सिंहदरबारस्थित कार्यकक्षमा अनुपस्थित भएका छन् । 

संस्थापन पक्षका सांसदले बिहीवार सापकोटालाई भेटेर कारवाही प्रक्रिया अगाडि बढाउन माग गरेका थिए । 

शुक्रवार कार्यालय समय शुरू भएलगत्तै एमाले सांसदहरू संसद् सचिवालयस्थित सभामुख सापकोटाको कार्यकक्षमा उपस्थित भएका थिए । लालबाबु पण्डित, खगराज अधिकारी, गोकुल बाँस्कोटा लगायत एक दर्जन सांसद सापकोटाको कार्यकक्षमा उपस्थित भएका थिए । 

सभामुखको कार्यकक्षबाट एमाले सचेतक शान्ता चौधरीले सापकोटालाई फोन गरेकी थिइन् । सापकोटाले आफ्नो अर्कै कार्यक्रम तय भएकाले आज सिंहदरबार नआउने जवाफ फर्काएका थिए । 

‘सभामुखज्यूले राजनीतिक आस्थाका आधारमा एमालेले गरेको कारवाही प्रक्रिया अगाडि बढाउन चाहनु भएन, सभामुख आफ्नो दायित्वबाट भाग्नुभयो,’ सभामुखको कार्यकक्षमा धर्नामा बसेका एक सांसदले लोकान्तरसँग भने । आइतवार र सोमवार सार्वजनिक बिदा परेकोले मंगलवार फेरि आफूहरू दबाबका लागि आउने एक सांसदले बताए । सभामुखले उपस्थित नहुने जनाएपछि एमाले सांसदहरू कार्यकक्षबाट बाहिरिएका थिए । 

सभामुख सापकोटाले माधव नेपाल पक्षमाथि गरिएको कारवाही प्रक्रिया अगाडि नबढाएको भन्दै एमाले अध्यक्ष केपी शर्मा ओलीले बिहीवार आपत्ति जनाएका थिए । 

पार्टी विभाजनको गतिविधि शुरू गरेपछि ओलीले भदौ १ गते नेपाल सहित १४ सांसदलाई पदमुक्त गर्न संसद सचिवालयमा पत्र दर्ता गराएका थिए ।