फूलहरूको पर्व तिहारमा पछिल्लो समय कृत्रिम फूलले बजार पाउन थालेको छ । 

फूलमा नेपाल आत्मनिर्भर हुन लागेको बताउँदै गर्दा आयातित तथा कृत्रिम फूलहरूले भने महत्त्वका साथ बजार पाउन थालेको देखिएको छ । 

घरमा तोरन टाँग्न तथा अन्य सजावटका लागि कृत्रिम फूलको प्रयोग गर्ने चलन पछिल्लो समय बढ्दै गइरहेको छ ।

भन्सार विभागको तथ्यांकअनुसार यस वर्षको असोजमा मात्रै १ करोड ६३ लाख ३० हजार रुपैयाँ बराबरको कृत्रिम फूल तथा कृत्रिम फूलबाट बनाइएका अन्य आकर्षक वस्तुहरू आयात भएको छ । 

असोज महिनामा मात्रै सो परिणामको कृत्रिम फूल आयात गरिएको भएपनि तिहार लक्षित गरेर व्यापारीहरूले भदौदेखि नै यस्ता फूलहरूको आयात थालेका थिए । 

आर्थिक वर्ष २०७८/७९ को तीन महिनामा मुलुकमा ३ करोड १० लाख ८६ हजार रुपैयाँ बराबरका कृत्रिम फूल आयात भएको भन्सार विभागले जनाएको छ । 

भाद्रसम्ममा १ करोड ४७ लाख ५६ हजार रुपैयाँ बराबरको कृत्रिम फूल आयात भएको थियो ।

चालु आर्थिक वर्षको तीन महिनामा ८६ हजार ८ सय २२ किलोग्राम कृत्रिम फूल आयात भएको विभागको तथ्यांक छ । 

गाउँमा समेत फेरिँदै ट्रेन्ड

पछिल्लो समय घर तथा अन्य भवनहरूमा सजावटका लागि कृत्रिम फूलहरूको प्रयोग बढ्न थालेको व्यवसायीहरू बताउँछन् । 

काठमाडौंको हात्तीसरमा फूल व्यवसाय गर्दै आएका व्यवसायी अनुप थापाले पछिल्लो समय होटल तथा घर र भवन सजावटका लागि यस्ता फूलहरू किन्ने क्रम बढेको बताए ।

उनका अनुसार काठमाडौंमा त यसको बजार छ नै, तर गाउँघरमा समेत यसको प्रयोगले व्यापकता पाएको छ । 

‘गाउँघरमा घर सजाउनका लागि सामान्य मूल्यका कृत्रिम फूल र यस्ता फूलहरूबाट बनाइएका माला प्रचलनमा आउन थालेको छ,’ उनले भने ।

उनका अनुसार, ठूला आकारका माला तथा फूलहरू होटल तथा ठूला भवनमा लैजाने गरिएको छ ।

यस्तै सामान्य खालका भने गाउँघरमा चलनमा आउन थालेको छ । 

सयपत्रीको फूल महँगो हुँदा समेत कृत्रिम फूलमा ग्राहकहरूको आकर्षण बढेको पुष्प व्यवसायी रमेश शाही बताउँछन् । 

पछिल्लो समय सयपत्री तथा मखमली फूलको मूल्यमा वृद्धि भएसँगै कृत्रिम फूलको माग बढेको उनको भनाइ छ ।

‘अहिले सबैले बेच्न थालेपछि न्यून मात्रामा मैले पनि कृत्रिम फूल बिक्रीका लागि राखेको छु, केही ग्राहकहरूले लैजाने गरेको देखिन्छ,’ उनले लोकान्तरसँग भने ।  

उनका अनुसार, पछिल्लो समय सस्तो तथा नओइलाउने फूलका रूपमा कृत्रिम फूललाई गाउँघरमा समेत प्रयोग गर्न थालिएको छ । 

कुन–कुन देशबाट हुन्छ आयात ? 

प्राय व्यवसायीहरूले कृत्रिम फूलहरू भारतबाट मगाउने गरेका छन् । 

यसका साथै चीन, अमेरिका, जापान, थाइल्याण्ड लगायतका मुलुकबाट पनि नेपालमा कृत्रिम फूलहरू भित्रिएका छन् । 

व्यवसायीहरूले कन्टेनरबाट र सामुद्रिक माध्यमबाट भारत हुँदै नेपालमा समेत फूलहरू भित्र्याउँदै आएका छन् ।