नेपाल बार एसोसिएसनका महासचिव लीलामणि पौडेलले आफूहरूको विरोध कार्यक्रममा प्रधानन्यायाधीश चोलेन्द्रशमशेर जबराले भिजिलान्ते पठाएको आरोप लगाएका छन् । 

जबरालाई अदालत प्रवेशमा रोक्ने भन्दै बारले सर्वोच्चको गेटमा आयोजना गरेको कार्यक्रममा महासचिव पौडेलले प्रधानन्यायाधीशले भिजिलान्ते प्रयोग गरेको आरोप लगाएका हुन् । 

‘बारको आन्दोलन प्रभावित गर्न प्रधानन्यायाधीश जबराले भिजिलान्ते प्रयोग गरिएको सूचना पाएका छौं, हाम्रो आन्दोलन अझ सशक्त हुन्छ,’ पौडेलले भने । बारको धर्ना चलिरहेको समयमा बारको विरोध र चोलेन्द्रको पक्षमा नाराबाजी भएको थियो । त्यसक्रममा ६ जना पक्राउ परेका थिए । 

सर्वोच्चको गेटमा भएको धर्ना कार्यक्रममा सर्वोच्च बारका अध्यक्ष पूर्णमान शाक्यले अहिलेको नेतृत्वको कारण सर्वोच्च अदालतको गरिमा र निष्पक्षतामा प्रश्न उठिरहेको बताए । नेतृत्व नै विसंगतिमा लागेकोले राजीनामा माग गरिएको उनले बताए ।