पसलमा नमकिन किन्दा कोरोना खोप कार्ड अनिवार्य, कार्ड नभए किन्न नपाइने

कोरोना भाइरस संक्रमण विरुद्धको खोप लगाउने अभियान विश्वव्यापी रूपमा चलिरहेको छ ।

कतिपय ठाउँमा सर्वसाधारणले खोप लगाउन आनाकानी गरिरहेका छन् । यस्तो अवस्थामा स्थानीय स्तरमा अनौठा अभियान चलिरहेका छन् ।

भारतको मध्यप्रदेशस्थित रतलाममा कोरोना खोप नलगाउनेलाई नमकिन किन्न नपाइने नियम बनाइएको छ । त्यहाँ पसलबाट नमकिन किन्दा कोरोना खोप कार्ड देखाउनुपर्नेछ ।

यो नियम कुनै २–४ पसलमा होइन, पूरै शहरमा कोरोना खोप कार्ड विना नमकिन नपाइने भारतीय सञ्चारमाध्यमले जनाएका छन् ।

रतलाम नमकिनका लागि प्रसिद्ध शहर हो । त्यहाँ रतलामका उपभोक्ता धेरै रहेका समाचारमा उल्लेख छ । 

कोरोनाको पहिलो डोज लगाइसकेका व्यक्तिहरूले दोस्रो डोज लगाउन उदासिनता देखाएपछि किनमेलमा नयाँ नियम बनाइएको हो । कोरोना नियन्त्रणका लागि व्यापारीले कोरोना खोप कार्ड अनिवार्य गर्ने सरकारी नियममा साथ दिएका छन् ।

विवाह समारोहमा सहभागी हुन समेत कोरोना विरुद्धका दुवै डोज खोप अनिवार्य गरिएको छ । विवाहको निमन्त्रणा कार्डमा नै खोपको अनिवार्यताबारे उल्लेख गर्ने गरिएको छ ।