भारतको उत्तर प्रदेशको योगी आदित्यनाथ सरकारबाट मन्त्री दारा सिंह चौहानले बुधवार राजीनामा दिएपछि त्यसको संकेतका विषयमा चर्चा चलेको छ ।

मंगलवार श्रममन्त्री स्वामी प्रसाद मौर्यले राजीनामा दिएर भारतीय जनता पार्टीबाट निस्केको घोषणा गरेको भोलिपल्ट वनमन्त्री चौहानले राजीनामा दिएका हुन् । 

दाराले राज्यपाललाई लेखिएको पत्रमा उल्लेख छ, ‘पिछडिएका, वञ्चितिमा पारिएका, दलित, किसान र बेरोजगार युवाहरूप्रति घोर उपेक्षात्मक दृष्टिकोणका साथै पिछडिएका तथा दलितको आरक्षणमा खेलाँची गरिएकाले आहत भएर म मन्त्रिमण्डलबाट राजीनामा दिँदैछु ।’

उत्तर प्रदेशका उपमुख्यमन्त्री केशव प्रसाद मौर्यले स्वामी प्रसाद मौर्य र दारा सिंह चौहानलाई मनाउने कोशिश गरेको भए पनि उनीहरूले मानेनन् । 

बुधवार कांग्रेस विधायक नरेश सैनी, समाजवादी पार्टीको टिकमा विधायक बनेका हरिओम यादव र समाजवादी पार्टीका पूर्व विधायक धर्मपाल सिंह भाजपामा आएको खबर पार्टीले दिएको छ । 

मौर्य र चौहानलाई अखिलेश सिंहले समाजवादी पार्टीमा स्वागत गरेका छन् । 

विगत केही महिनादेखि नेताहरूले दल परिवर्तन गर्दै आएका छन् । तर विधानसभा निर्वाचनको मिति घोषणा गरिएदेखि यसमा तीव्रता आएको छ । 

वरिष्ठ पत्रकार रामदत्त त्रिपाठी यसलाई स्वाभाविक मान्छन् । 

उनी भन्छन्, ‘चुनावअघि रिएलाइनमेन्ट हुन्छ । त्यो स्वाभाविक हो । तर अहिले भाजपा छोडेर जानेको संख्या धेरै देखिएको छ । मन्त्रीहरू पनि गइरहेका छन् ।’ 

ती नेताहरूलाई भाजपा सत्तामा फर्किने सम्भावना कम रहेको अनुभव भएको हुन सक्ने त्रिपाठीको अनुमान छ ।

उनी भन्छन्, ‘उनीहरू किन गए भन्ने मूल प्रश्न हो । भाजपाबाट चुनाव जित्न सकिन्न वा भाजपा फेरि सत्तामा आउँदैन भन्ने उनीहरूको आकलन हो कि ?’ 

उनी थप्छन्, ‘भाजपाले जुन गैरयादव पिछडिएका जातिलाई आकर्षित गरेको थियो, उनीहरूको मोहभंग भएको छ । भाजपाको शीर्ष नेतृत्वले यसलाई समयमै आकलन गर्न सकेन ।’

उत्तर प्रदेशको राजनीतिमा नजर राख्ने वरिष्ठ पत्रकार अम्बिकानन्द सहाय स्वामी प्रसाद मौर्य जस्ता मन्त्री जाँदा भाजपालाई घाटा हुन सक्ने बताउँछन् । 

उनी भन्छन्, ‘चुनावअघि केही मानिस पार्टी छोड्न सक्छन् । तर मौर्य त्यस क्याटेगोरीका हैनन् । यसले भाजपालाई घाटा गर्न सक्छ ।’

सहायका अनुसार, भाजपाले मौर्यलाई फकाउने कोशिश गरेको भए पनि उनले नफर्किने भनिसकेका छन् ।

यसको फाइदा समाजवादी पार्टीले उठाउन सक्ने सहाय दाबी गर्छन् । अखिलेश यादव भाजपाविरुद्ध रणनीति बनाउन खोज्दैछन् । 

उनी भन्छन्, ‘भाजपाले समाजवादी पार्टीलाई यादवहरूको दल भनी घोषणा गरेको थियो र निकै हदसम्म उसले त्यस्तो इम्प्रेसन पनि दिन सकेको थियो । तर यसपटक पिछडिएकाहरूलाई एकजुट गर्ने अखिलेश यादवको रणनीति हो र उनी यसमा सफल पनि भइरहेका छन् ।’

अम्बिकानन्द सहायले साना साना दलहरूसँग अखिलेशको गठबन्धन असरदार देखिएको बताए । 

उनले भने, ‘राजभर, मौर्य, कुशवाहा र सैनी उनीसँग जोडिएका छन् । मल्लाह पनि जोडिएका छन् । अनुप्रिया पटेल भाजपासँग छिन् । तर कृष्णा पटेल अखिलेशसँग छन् ।’

स्वामी प्रसाद मौर्यसँग समाजवादी पार्टीबाहेक अन्यत्र भविष्य छैन भन्ने कुरा पनि सहाय बताउँछन् । 

उनी भन्छन्, ‘उनी समाजवादी पार्टीमा गइरहेका छन् भन्ने मेरो सूचना छ । भाजपामा उनी फर्किन्नन् । मायावतीको ढोका उनका लागि बन्द छ । त्यहाँ उनी फर्किने कुरै छैन ।’

मौर्य धरातलसँग जोडिएका र धेरै किसिमका समर्थक भएका नेता भएकाले उनी हट्दा भाजपालाई घाटा हुने सहायले बताए ।