प्रधानमन्त्री एवं नेपाली कांग्रेसका सभापति शेरबहादुर देउवाले जेठको पहिलो साताभित्र स्थानीय तहको चुनाव सम्पन्न गर्ने बताएका छन् ।

सकभर एकै चरणमा चुनाव गर्ने र दुई चरणमा गर्नुपरे पनि जेठ पहिलो साताभित्र चुनाव हुने उनको भनाइ थियो । 

देउवालाई भेट्न बालुवाटार गएका नेपाली कांग्रेस बागमती प्रदेश समितिका पदाधिकारीहरूसँग सोमवार साँझ प्रधानमन्त्रीले जेठको पहिलो साताभित्र चुनाव गर्ने बताएका हुन् । 

‘जेठको पहिलो साताभित्र स्थानीय तहको चुनाव हुन्छ, त्यसको तयारीमा लाग्न प्रधानमन्त्रीज्यूले निर्देशन दिनुभयो,’ कांग्रेस बागमती प्रदेशका सभापति इन्द्र बानियाँले लोकान्तरसँग भने । प्रधानमन्त्रीको मनसाय चुनाव एकै चरणमा गर्ने रहेको उनको भनाइ छ । 

‘सुरक्षा या प्राविधिक कारणले एकै चरणमा सम्पन्न गर्न सकिएन भने पनि जेठको पहिलो सातामै देशभर चुनाव हुन्छ,’ देउवाको भनाइ उद्धृत गर्दै बानियाँले लोकान्तरसँग भने ।

जेठको पहिलो साता चुनाव गर्ने गरी मन्त्रिपरिषद्ले केही दिनमा मिति घोषणा गर्ने देउवाले बताएका थिए । ‘निर्वाचन आयोगले जेठ ५ अगावै चुनाव गर्नुपर्ने भनेको छ, जेठ ४ मै चुनाव शुरू हुन्छ,’ देउवाको भनाइबारे भेटमा सहभागी अर्का एक नेताले लोकान्तरसँग भने ।

देउवाले अमेरिकी आर्थिक सहयोग कार्यक्रम मिलेनियम च्यालेन्ज कम्प्याक्ट (एमसीसी) पनि सहमतिमै संसदबाट अनुमोदन हुने बताएका छन् ।

‘गठबन्धन टुट्दैन, एमसीसी पारित हुन्छ,’ भेटमा सहभागी अर्का एक नेताले भने । 

सोमवारको भेटमा कांग्रेस बागमती प्रदेशको कार्यालय बनाउने विषयमा समेत छलफल भएको बानियाँले बताए ।

काठमाडौंमा पार्टी कार्यालयको नजिक सम्पर्क कार्यालय र हेटौंडामा कान्ति राजपथको सानोपखारा चोकमा प्रदेश कार्यालय स्थापना गर्नेबारे सभापतिसँग छलफल भएको बानियाँले बताए ।