युक्रेनका विषयमा रुस र पश्चिमी सैन्य गठबन्धन नेटोबीचे तनाव चलिरहँदा रुसका राष्ट्रपति भ्लादिमिर पुटिनले चेतावनी दिएका छन् । 

युक्रेन नेटोको सदस्य बनेमा आणविक युद्ध हुने चेतावनी उनले दिएका हुन् । यसबैची रुसले पोल्यान्ड सीमा नजिक बेलारुसमा आणविक हतियार लैजान सक्षम मिग–३१ विमानहरू तैनाथ गरेको छ । 

पुटिन र फ्रान्सका राष्ट्रपति इम्मानुएल म्याक्रोंबीचको कुराकानीमा युक्रेन सम्झौता भएको कुरा पनि रुसले खण्डन गरेको छ । 

फ्रान्सले पुटिनसँगको कुरामा युक्रेनका विषयमा छुट प्राप्त गरेको भनी दाबी गरेको अवस्थामा रुसको खण्डन आएको हो । 

म्याक्रोंसँगको भेटमा पुटिनले रुसको चिन्तालाई पश्चिमी मुलुकहरूले बेवास्ता गरेको बताए । 

युक्रेनमा तनाव चर्काउन नचाहेको भनी पुटिनले आफूलाई बताएको म्याक्रोंले जानकारी दिए । अनि बेलारुसमा रुसको स्थायी ठेगाना नभएको र रुसी सेना स्थायी रूपमा तैनाथ पनि नहुने उनले आश्वासन दिएको म्याक्रोंले बताए । 

अहिले रुसले आफ्ना हजारौं सैनिक बेलारुसमा तैनाथ गरेको छ । 

पुटिनले रुस प्रमुख आणविक शक्ति भएको र उससँग भएको आधुनिक हतियार अन्य मुलुकसँग पनि नभएको समेत म्याक्रोंलाई बताएका छन् । नेटो र रुसको संघर्षमा कोही पनि विजेता नहुने पुटिनको भनाइ छ ।