नेकपा महासचिव नेत्रविक्रम चन्द विप्लवले सार्वभौम भनिएको नेपालको संसद् अमेरिकी भत्ता पचाउने कठपुतली बनेको आरोप लगाएका छन् । 

अमेरिकी आर्थिक सहयोग कार्यक्रम एमसीसीको विरोधमा साना ६ दलले शुक्रवार काठमाडौंमा आयोजना गरेको सभालाई सम्बोधन गर्दै विप्लवले जनताले फर्काउन खोजेको एमसीसी अनुमोदन गरेर संसदले राष्ट्रघात गरेको आरोप लगाएका हुन् । 

‘जनताले एमसीसी खारेजीको माग गरेका छन्, थोरैले देश बेचेर खान पाउँछन् ? यस्तो राष्ट्रघात र अपराध गर्ने कसरी सार्वभौम संसद हुन्छ ? अमेरिकी भत्ता पचाउने कठपुतली संसद हो,’ विप्लवले भने, ‘नेपालको सार्वभौम संसद रहेनछ, नेपाली जनताले फर्काउन चाहन्थे, संसद कठपुतली बनेको छ । यो संसद्ले गरेको निर्णय सार्वभौमिक हुँदैन ।’

विप्लवले संसद्बाट पारित भयो भनेर हल्ला गरिए पनि एमसीसी कार्यान्वयन गर्न नदिने चेतावनी दिए ।