वैशाख ३० गते हुने स्थानीय तह निर्वाचनलाई लक्षित गरेर नेपाली कांग्रेसले फागुन २९ गतेदेखि १ महिने चुनावी अभियान शुरू गर्ने भएको छ । 

पार्टी केन्द्रीय कार्यालय सानेपामा पत्रकार सम्मेलन आयोजना गरी वैशाख ३० गतेको चुनावमा कांग्रेसलाई जिताउन ७७ जिल्लामा केन्द्रीय नेता पठाएर अभियान सञ्चालन गर्न लागेको जनाएको छ ।

पार्टी सभापति एवं प्रधानमन्त्री शेरबहादुर देउवाको उपस्थितिमा अभियान घोषणा गर्ने भनिए पनि पार्टी पदाधिकारीको उपस्थितिमा अभियानको घोषणा गरिएको हो ।

कांग्रेस प्रवक्ता डा. प्रकाशशरण महतले विषेश कारणले देउवा उपस्थित हुन नसकेको जानकारी गराए ।

वैशाख ३० गतेको स्थानीय निर्वाचनलाई केन्द्रित गरेर फागुन २९ देखि चैत्र २९ गतेसम्म ‘घरघर जाउ, नेपाली कांग्रेस जिताऔं’ अभियान सञ्चालन गर्न लागिएको कांग्रेस प्रवक्ता महतले जानकारी गराए । 

कांग्रेस नेतृत्वको सरकारले गरेका राजनीतिक र आर्थिक उपलब्धिलाई सशक्त ढंगबाट नेपाली जनताको बीचमा राखेर पुनः स्मरण गराउने महतले बताए । 

निवर्तमान केपी शर्मा ओली सरकारले गरेका गलत कामको भण्डाफोर र एमसीसीबारे छरिएका भ्रम निवारणसहित ८ एजेण्डा लिएर जनतामा जान लागिएको महतले बताए ।

‘हरेक काधँलाई भारी, हरेक हातलाई जिम्मेवारी’ भन्ने नारा बनाएर कांग्रेसका सबै कार्यकर्तालाई जिम्मेवारी दिन लागिएको महतले बताए ।