एमालेसँग चुनावी तालमेलबारे प्रचण्डको जवाफ : कांग्रेसले लखेट्न थाल्यो भने के हुन्छ ...

नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले तत्कालै नेकपा एमालेसँग चुनावी तालमेलको सम्भावना नभए पनि राजनीतिमा असम्भव केही नहुने बताएका छन् ।

नेपाली कांग्रेसले माओवादीलाई लखेट्न खोजेमा एमालेसँग गठबन्धन नहोला भन्न नसकिने उनको टिप्पणी छ । 

प्रेस सेन्टर लुम्बिनीले बिहीवार बुटवलमा आयोजना गरेको पत्रकार सम्मेलनमा अध्यक्ष प्रचण्डले गठबन्धनका दलहरूबीच नै चुनावी तालमेलको सम्भावना रहेको बताएका हुन् ।

‘अहिले हामी गठबन्धनमा छौं, सरकार पनि त्यसैगरी छ । तत्काल एमालेसँग तालमेल हुने सम्भावना देखेका छैनौं,’ प्रचण्डले भने । 

अध्यक्ष प्रचण्डले कांग्रेसको भूमिकाबाट अन्य दलसँग तालमेल हुने/नहुने निर्धारण हुने बताए । ‘एमालेसँगको चुनावी तालमेलको कुरा नेपाली कांग्रेसको व्यवहारमा भर पर्ने कुरा हो, राजनीतिमा असम्भव भन्ने पनि हुँदैन । मैले संसदबाट भनेको छु, राजनीतिमा असम्भव भनेको छैन, सम्भावनाको खेल हो,’ प्रचण्डले अगाडि भने, ‘कांग्रेसका नेताहरूले माओवादीसँग तालमेल हुँदैन भनेर गरिएका कुरा, अतिवादी ढंगले देखिएको छ । कांग्रेसले लखेट्न थाल्यो भने परिस्थिति के हुन्छ भन्न सकिँदैन तर देउवाले गठबन्धनलाई मिलाएर जाने कुरा गर्नुभएको छ ।’

अध्यक्ष प्रचण्डले आफ्नै तागतले निर्वाचनमा होमिने बताए । त्यसका लागि संगठनलाई बलियो बनाउन नेता–कार्यकर्तालाई उनले निर्देशन दिए ।

उनले भने, ‘राजनीतिक रूपमा सुसूचित र आर्थिक रूपमा जनतालाई सम्पन्न बनाउने पार्टीको एजेण्डालाई मुख्य ध्यानमा राखेर आफ्नै तागतमा निर्वाचन अभियानमा होमिन हामीले नेता कार्यकर्तालाई निर्देशित गरेका छौं ।’

अध्यक्ष प्रचण्डले गठबन्धन गरेर मात्र चुनाव जितौंला भन्ने नसोच्न नेताहरूलाई सचेत समेत गराए । ‘गठबन्धनमार्फत चुनावी परिणामलाई सकारात्मक बनाउने विषयलाई सहायक रणनीति बनाएर अघि बढ्नुपर्छ,’ उनले भने ।

प्रचण्डले एमसीसीका कारण नयाँ गठबनधन बन्छ कि जस्तो देखिएपछि व्याख्यात्मक घोषणाबाट एमसीसी अनुमोदन गराएपछि हालका लागि गठबन्धन सुरक्षित रहेको बताए । 

प्रचण्डले निर्वाचन हुँदैन कि भन्ने भ्रम हटेको बताए । ‘तोकिएको समयमै चुनाव हुन्छ । त्यसमा कुनै कन्फ्युजनमा नरहन सबैलाई आग्रह गर्दछु,’ प्रचण्डले भने, ‘निर्वाचनबारे कुनै कन्फुयुजन भए तयारीलाई असर गर्छ । अहिले पूरै तयारीका साथ लाग्ने अहिलेको विषय हो ।’