पल शाह प्रकरण : थुनछेक बहस लम्बिने सम्भावना

अभिनेता तथा मोडल पल शाहलाई जिल्ला अदालत तनहुँ पुर्पक्षका लागि कारागार पठाउने वा नपठाउने भन्ने बहस आज सकिने सम्भावना कम देखिएको छ । 

जिल्ला प्रहरी कार्यालय तनहुँले सरकारी वकिलको कार्यालय मार्फत मंगलवार अदालतमा मुद्धा दायर गरेको थियो । हिजो (बुधवार) अभियुक्त पल शाहको बयान र उनका म्यानेजरको बयान गर्दा गर्दै समय सकिएको थियो । पुर्पक्ष पठाउने नपठाउने भन्ने विषयमा बहस भइरहेको छ । 

पल शाहको पक्षमा ९ जना कानुन व्यवसायीहरुले बहस गरिरहेका छन् । मुद्दा दायर भएलगत्तै तनहुँ जिल्ला अदालतले चैत ८ गते प्रतिवादी पल शाह र चैत ९ गते उनका म्यानेजर कृष्ण जोशीको बयान लिएको थियो । त्यसलगत्तै दुवैजनालाई थुनामै राखी मुद्दाको पुर्पक्ष गर्नुपर्ने भन्दै जिल्ला सरकारी वकिल कार्यालय तनहुँका जिल्ला न्यायाधिवक्ता रामचन्द्र शर्मा, अधिवक्ताद्वय मोहना अन्सारी र राधिका खतिवडा लगायतका ७ जनाले बहस गरेका थिए । 

गत फागुन १५ गते पल आफैं प्रहरी कार्यालयमा हाजिर भएका थिए ।

हिरासतमा पछिल्लो पटक गत शुक्रवार उनलाई थप ५ दिन हिरासतमा राख्न अदालतले अनुमति दिएको थियो । यसअघि पहिलो पटक ७ दिन र दोस्रो पटक १२ दिन म्याद थप भएको थियो । 

जिल्ला अदालत नवलपुरमा उनलाई १२ देखि १४ वर्ष कैद र ४ लाख रूपैयाँ जरिवाना गर्न माग गरिएको छ । उनीविरुद्ध बलात्कारको जाहेरी दिने नाबालिग १५ वर्ष ८ महिना ४ दिनको भएको पुष्टि भएको प्रहरीले जनाएको छ ।

१८ वर्षभन्दा कम उमेरका नाबालिगलाई सहमतिमै करणी गरे पनि बलात्कार मानिने कानूनी व्यवस्था छ । १४ देखि १६ वर्ष उमेरका नाबालिग बलात्कार गर्नेलाई १२ देखि १४ वर्षसम्म कैद सजाय हुने व्यवस्था कानूनमा छ ।