नेकपा एमाले रुपन्देहीले आउँदो शनिबार  जिल्लाका १६ वटै पालिका अन्तर्गतका वडाहरूमा वडा अध्यक्ष तथा सदस्य पदका उम्मेदवारको छनौट गर्ने भएको छ । पार्टी जिल्ला कमिटीको तेश्रो पूर्ण बैठकले २८ गते सम्ममा प्रस्तावित उमेदवारको नाम जिल्लामा पठाउने गरि निर्णय गरेको जिल्ला कमिटीका सचिव यज्ञ गैरेले बताए । 

बैठकले वैशाख ९ गते प्रत्येक पालिका कमिटीले घोषणा- पत्र तथा प्रतिवद्धता सार्वजनिक गर्ने, पार्टीका तर्फबाट जनप्रतिनिधि जितेका पालिकामा पाँच वर्ष भित्र गरिएका कामहरु तथा संघ र प्रदेशका तर्फबाट भएका कामहरु जनताको बिचमा लैजाने बैठकले निर्णय गरेको छ । 

त्यसै गरि स्थानीय तहको निर्वाचन सम्पन्न गर्न ११ हजार १ सय ११ सदस्यीय निर्वाचन परिचालन कमिटी गठन गरेको बैठकले  निर्वाचन अभियानसँगै पार्टी सदस्यता नवीकरण तथा नया सदस्यता विस्तार अभियानलाई तिव्र पार्ने निर्णय गरेको छ ।

बैठकमा बोल्दै  पार्टीका केन्द्रीय सचिव तथा लुम्बिनी प्रदेश इन्चार्ज छविलाल विश्वकर्माले रुपन्देहीको १६ वटै स्थानीय तहमा नया इतिहास कोरिने गरि पार्टी काममा लाग्न कार्यकर्ताहरूलाई निर्देशन दिए ।