प्रतिनिधि सभाका सभामुख अग्निप्रसाद सापकोटा र चीनको राष्ट्रिय जनकंग्रेसको स्थायी समितिका अध्यक्ष लि चाङ्सुबीच भर्चुअल माध्यमबाट दुवै देशका संसद, मैत्री सम्बन्ध, देशको विकास तथा अन्य जनहितका विषयमा द्विपक्षीय छलफल सफलतापूर्वक सम्पन्न भएको छ ।

सभामुख सापकोटाको कार्यकक्षबाट अपराह्न १ः४३ बजे शुरू भएको बैठक करीब सवा घण्टा चलेको थियो ।

आपसी अभिवादनबाट औपचारिक रूपमा शुरू भएको बैठकमा अध्यक्ष लि चाङ्सुले अभिवादन गर्दै छलफल शुरू गरेका थिए । २ देशबीच उच्चस्तरीय भ्रमण तथा विचार आदानप्रदान नेपाल र चीनबीच रहिआएको सम्बन्ध, विगतमा नेपालका सभामुख तथा ससंदका सदस्यहरूले गरेको मित्र राष्ट्र चीनको भ्रमणहरूले नेपाल र चीन युगौंदेखि भूगोल, संस्कृति तथा परम्पराहरूले नजिकबाट जोडिएको बताउँदै सम्बन्धको जग जनस्तरसम्म फैलिएको, व्यापक र सुमधुर रहेकाले थप गौरवान्वित हुन पाएको बताए । 

उनले नेपालको सार्वभौमिकता, भौगोलिक अखण्डता तथा राजनीतिक स्वतन्त्रताको लागि चीनले सम्मान गर्ने बताउँदै कोरोना महामारीको प्रभावकारी नियन्त्रण, रोकथाम र प्रतिकार्यमा चीनले नेपाललाई सहयोग गरेको र यस प्रकारको सहयोगले सरकार सरकारबीच मात्र नभई जनस्तरको सम्बन्धलाई समेत अझ व्यापक र प्रगाढ बनाउन थप मद्दत पुग्ने कुरामा जोड दिए ।

नेपालमा चीनले विगत लामो समयदेखि विकास निर्माण, अर्थतन्त्र विकास, स्वास्थ्य उपचार र सांस्कृतिक सम्बन्ध विकासमा योगदान पुर्‍याएको बताए । भूकम्प, महामारी लगायत विपद्का समयमा नेपाल चीन आपसमा भरपर्दो छिमेकी रहेको बताए । खासा, केरुङ लगायतबाट हुने व्यापार तथा आवतजावतलाई सुलभ तुल्याइने र नेपालको खेलकुद तथा शिक्षाको विकासमा चीनले योगदान दिने बताए ।

भर्चुअल बैठकको आयोजना प्रस्ताव गरेकोमा चिनियाँलाई हार्दिक आभार प्रकट गर्दै संघीय संसद, प्रतिनिधि सभाका सभामुख छलफलमा सरिक भए । उनले नेपालको सार्वभौमिकता, भौगोलिक अखण्डता तथा राजनीतिक स्वतन्त्रताको लागि चीनको निशर्त सम्मानको खुला दिलले प्रंशसा गरे । आगामी दिनमा समेत नेपाल चीनसम्बन्ध अझ प्रगाढ र परिष्कृत बनाउन संघीय संसदले कुनै कसर बाँकी नराख्ने  विश्वास दिलाए ।

सभामुख सापकोटाले २ देशबीचको सम्बन्धलाई आजको स्तरमा ल्याइपुर्‍याउनको लागि समग्र संघीय संसद, प्रतिनिधि सभाका सदस्यको समेत महत्त्वपूर्ण भूमिका रहेको चर्चा गर्दै आगामी दिनमा समेत नेपाल चीन सम्बन्ध अझ प्रगाढ र परिस्कृत बनाउन संघीय संसदले कुनै कसर बाँकी नराख्ने बताए ।

भर्चुअल बैठकमा नेपालका तर्फबाट संघीय संसद सचिवालय र परराष्ट्र मन्त्रालयका वरिष्ठ अधिकारीहरू र चिनियाँ पक्षबाट राष्ट्रिय जनकांग्रेसका विभिन्न समितिका अध्यक्ष र परराष्ट्र मन्त्रालयका उपमन्त्रीहरूको समेत उपस्थिति रहेको थियो । बैठकका क्रममा दुवै पक्षबाट नेपाल चीन सम्बन्धका विविध पक्षमा गहन विचार आदान प्रदान हुनुका साथै २ देशका संसद्बीच उच्च स्तरीय भ्रमणको आदानप्रदान निरन्तर हुनुपर्नेमा जोड दिइएको थियो ।

अन्त्यमा राष्ट्रिय जनकंग्रेसका अध्यक्ष लि चाङ्सु र सभामुखले आपसमा अनुकूल समयमा भ्रमण गर्न निम्तो आदानप्रदान गरे । दुवै मुलुकका विधायिकी बीचको यस्ता भ्रमण र विचार आदानप्रदानले थप घनिभूत सम्बन्ध स्थापना हुने निष्कर्षमा पुग्दै आगामी दिनमा यसलाई निरन्तरता दिने गरी छलफल समापन गरिएको थियो ।