उद्योग वाणिज्य तथा आपूर्ति मन्त्री दीलेन्द्रप्रसाद बडूले महिनामा दुई पटकभन्दा बढी पेट्रोलियम पदार्थको मूल्य समायोजन नभएको दाबी गरेका छन् । 

शुक्रवार राष्ट्रिय सभामा प्रस्तुत जरुरी सार्वजनिक महत्त्वको प्रस्तावमा उठेका विषयहरूको जवाफ दिँदै मन्त्री बडूले प्रस्तावमा उल्लेखित २०७९ जेठ १ गते र जेठ ९ गते लागू हुने गरी दुई पटक मूल्य बढाएको भन्ने विवरणमा कुनै सत्यता नभएको स्पष्ट पारेका हुन् । 

उनले २०७८ चैत महिनामा २ गते र २२ गते गरी मूल्य समायोजन भएको र २०७९ वैशाखमा ३१ गते र जेठ महिनामा ८ गते एकपटक मात्र मूल्य समायोजन गरिएको बताए । 

मन्त्री बडूले पेट्रोलमा अहिले पनि ३१ रूपैयाँ ४१ पैसा प्रतिलिटर घाटा रही मासिक १ अर्ब ८३ करोड घाटा, डिजेलमा २८ रूपैयाँ ३३ पैसा प्रतिलिटर घाटा रही मासिक ३ अर्ब ७३ करोड घाटा, एलपी ग्यासमा ७५१ रूपैयाँ १४ पैसा प्रतिसिलिण्डर घाटा रही मासिक २ अर्ब ८६ करोड घाटा तथा मट्टितेल र हवाई इन्धनमा मासिक ६५ करोड नाफा रहेको बताए । 

उनले नाफा र घाटा मिलाउँदा हाल मासिकरुपमा निगम ७ अर्ब ७७ करोड घाटामा रहेको उल्लेख गरे । चालु आर्थिक वर्षको हालसम्म नेपाल आयल निगमलाई करीब ४७ अर्ब घाटा भइसकेको पनि बताए ।