जहाँबाट धेरै माग हुन्छ त्यहीँबाट चुनाव लड्छु- रवि लामिछाने

नयाँ राजनीतिक दल गठन गर्ने घोषणा गरेको रवि लामिछानेले कुन निर्वाचन क्षेत्रबाट उम्मेदवारी दिने भन्ने खुलाउन चाहेनन् । 

मंगलवार काठमाडौंको राष्ट्रिय सभा गृहमा आयोजित घोषणा सभामा लामिछानेले जहाँबाट धेरै आफ्नो माग आउँछ त्यहीँबाट उम्मेदवारी दिने बताएका छन् ।

उनले भने, ‘हुन त मलाई झापा, डडेलधुरा र चितवनबाट चुनाव लड्न मन छ । ती ठाउँबाट चुनाव लड्न डराएको होइन । सरकारमा को छन् र कस्तो चुनाव गराएका छन् मलाई थाहा छ । हामीलाई हार्ने सुविधा छैन ।’ 

आवेगमा आएर र भावनामा बगेर नभई सोच विचार गरेर निर्वाचन क्षेत्र छान्ने उनले बताए । 

‘राजनीतिक पत्रकारिता जस्तो नुहने रहेछ । आवेशमा आएर होइन, भावनामा बगेर होइन । जहाँबाट धेरै मानिसले चाहन्छन् त्यहीबाट चुनाव लड्नेछु,’ उनले बताए । 

उनले आगामी निर्वाचनबाट एक जनालाई संसदमा प्रवेश गर्न आफूले रोक्ने र अरूलाई रोक्न देशभर तयार हुन पनि लामिछानेले आह्वान गरेका छन् । 

‘एक जनालाई संसद छिर्नबाट म रोक्छु । बेथितिको यो मेन स्वीचलाई अफ गरिदिऔं । संसदमा छिर्नबाट रोक्न देशभर तयार हुनुहोस्,’ उनले भने ।