रविको पार्टीको कार्यालय बसुन्धारामा, झण्डामा ७ तारा

रवि लामिछानेको राष्ट्रिय स्वतन्त्र पार्टीको केन्द्रीय कार्यालय बसुन्धारा चोकमा स्थापना गरिएको छ । 

केन्द्रीय कार्यालय स्थापनाका क्रममा ठूलो संख्यामा समर्थकहरूको सहभागिता थियो । साथै सो पार्टीको झण्डामा नीलो पृष्ठभूमिमा ७ वटा तारा राखिएको छ । 

पत्रकारिता पेशा छाडेर सक्रिय राजनीति शुरू गरेका रविले मंगलवार दल घोषणा गरेका हुन् । उनले  दल दर्ताका लागि निर्वाचन आयोगमा निवेदनसमेत दिइसकेका छन् । 

रविले पार्टीले संवैधानिक समाजवादको सिद्धान्तलाई अंगीकार गर्ने बताएका छन् ।