नेकपा एमालेका उपाध्यक्ष तथा पूर्व अर्थमन्त्री विष्णु पौडेलले विकासका काममा राजनीति नगर्न आग्रह गरेका छन् । 

बुटवल-सैनामैना जोड्ने दानव नदी पुल (कर्साघाट) को सोमवार उद्घाटन गर्दै उनले  कुनै पनि दलको राजनीतिक स्वार्थले विकास निर्माणको काममा अवरोध हुन नहुने बताएका हुन् । 

बुटवलको तिनाउ-दानव करिडोरमा यस्तै प्रकारको राजनीति भएको दृष्टान्त प्रस्तुत गर्दै उनले यहाँका सबै नागरिकले माग गरेर मात्र यो आयोजना बनाएको दाबी गरे ।

पौडेलले विकासका लागि सबै एक ठाउँमा उभिनुपर्नेमा जोड दिए ।

तिनाउ-दानव नदी करिडोरको विषयमा जनतालाई भ्रम सिर्जना गर्ने काम भएको बताउँदै उनले उक्त करिडोर निर्माणमा अवरोध भएकोप्रति चिन्ता व्यक्त गरे ।

‘करिडोरमा नदीको बहाव क्षेत्र छोडेर सडक बनाउने हो, किनारमा बसेकाहरूलाई जबर्जस्त हटाउने हैन, अझ राम्रो ठाउँमा पूर्वाधार विकास गरेर स्थानान्तरण गर्ने हो,’ उनले भने, ‘दुवै किनारमा करिडोर गराउँदा यो ठाउँ कहाँ पुग्ला ?  तपाईंहरू कल्पना गर्नुस् ।‘

विकासको कुरा गर्दा रूपन्देही जिल्ला मात्र नभई सिंगो लुम्बिनी प्रदेशनै अब्बल भएको दाबी गर्दै उनले विकासको मोडल हेर्न आउनेहरूका लागि रूपन्देही मानक बनेको समेत बताए । 

‘भैरहवा एयरपोर्टको दोश्रो चरणको कामको तयारी पूरा भएको छ, तिनाउमा सिग्नेचर ब्रिज बन्दै छ, गोरूसिंगेसम्मको सडक चौडा बन्दैछ । केही हप्तामा टेण्डर हुँदैछ,’ पौडेलले भने, ‘विकासका प्रश्नमा जनताले साथ दिनुस् हामी पूरा गर्छौ‌ं ।’

बुटवल-१५ र सैनामैना-१ लाई जोड्ने गरी १२७ मिटर लामो पुलको एमाले उपाध्यक्ष पौडेलले उद्घाटन गरेका हुन् । ११ मिटर चौडा रहेको उक्त पुल ३ वटा स्यालबमा पाइल फाउण्डेशन प्रविधिमा निर्माण गरिएको हो ।

संघीय सरकारको लगानीमा २०७४ असार २९ गते कार्य सम्झौता भएको यो आयोजनामा  कोरोना महामारीले असर गर्दा २०७८ पुस ३० गते पुनः म्याद थप गरिएको थियो ।

कुल १६ करोड ६० लाख ४७३ लागत अनुमान गरिएको योजनाका लागि अर्घाखाँची/बबुल जेभीसँग १३ करोड ९० लाख ३६ हजार ८०९ रूपैयाँमा ठेक्का सम्झौता भई काम सम्पन्न भएको थियो ।