नेपाल रिङ रेस्लिङ संघ र जापानस्थित ०१ जापानबीच नेपालमा रेस्लिङ खेलको तालिम सञ्चालनसम्बन्धी सम्झौता भएको छ । लैनचोरस्थित रिङ रेस्लिङ एकेडेमीमा भदौ १५ गतेदेखि ६ महिने विशेष व्यवसायिक रिङ रेस्लिङ तालिम सञ्चालन गर्ने सहमति भएको हो । त्यसक्रममा जापानिज प्रशिक्षकले तालिम दिने सहमति भएको छ । 

व्यवसायिक रिङ रेस्लिङ बन्ने इच्छुक रेस्लरहरूले भदौ १ गतेसम्म आफ्नो नाम दर्ता गराउनुपर्ने संघले जनाएको छ । तालिममा ५० जनालाई निशुल्क प्रदान गरिने संघले जनाएको छ । अन्तर्राष्ट्रिय प्रतियोगिताहरूमा नेपाली रिङ रेस्लिङहरूको सहभागिता बढाउने उद्देश्यले तालिम सञ्चालन गर्न लागिएको जनाइएको छ । 

तालिममा रिङ रेस्लिङसँगै खेल मनोविज्ञान, आहार र आकस्मिक उपचार पनि समावेश गरिने जनाइएको छ । छनोट भएका रेस्लरहरूलाई विभिन्न अन्तर्राष्ट्रिय प्रतियोगिताहरूमा सहभागी गराइने संघले जनाएको छ ।