नेकपा (एमाले)का सांसद पदम गिरीले प्रधानमन्त्री शेरबहादुर देउवा र शिक्षा, विज्ञान तथा प्रविधिमन्त्री देवेन्द्र पौडेल त्रिभुवन विश्वविद्यालयको समस्या समाधान गर्न नलागेको आरोप लगाएका छन् । शुक्रवारको प्रतिनिधि सभा बैठकमा बोल्दै उनले विश्वविद्यालय अझै पनि बन्द अवस्थामा रहेको बताए । 

नेपाल विद्यार्थी संघले भिसीको कार्यालयमा गएर तोडफोड गर्ने तथा त्रिवि कार्यकारी समिति बैठकको कागजात खोस्नेलगायतका कामहरू गरिरहेको भन्दै उनले दोषी उपर मुद्दा दर्तासमेत हुन नसकेको बताए । सांसद गिरीले विश्वविद्यालयको समस्या समाधानका लागि सभामुखले गरेको रुलिङअनुसार काम नभएको भन्दै आपत्ति जनाए । 

उनले प्रधानमन्त्री र शिक्षामन्त्री विश्वविद्यालय खुलाउनतर्फ नलागेको आरोप लगाए । उनले प्रधानमन्त्री र शिक्षामन्त्रीलाई विश्वविद्यालय बन्द गराएर देशलाई कहाँ पु¥याउन खोजिएको हो भन्दै प्रश्नसमेत गरे । उनले विश्वविद्यालयको समस्या समाधानका लागि सभामुखलाई पुनः रुलिङ गर्न अनुरोध गरे । 

‘आज सम्पूर्ण त्रिभुवन विश्वविद्यालयका पदाधिकारी असुरक्षित छन् । फोन अफ गरेका छन् । घरमा सुत्न नसक्ने अवस्था भयो डरले । छिमेकीकोमा गएर सुत्नुपर्ने अवस्था आएको छ । यस्तो दूरावस्था विश्वविद्यालयभित्र छ’, उनले भने, ‘सरकारका प्रमुख प्रधानमन्त्री त्रिभुवन विश्वविद्यालयका कुलपति शेरबहादुर देउवाज्यू, सहकुलपति शिक्षामन्त्रीज्यू उहाँहरू आज विश्वविद्यालय खुलाउनतर्फ लाग्नुभएको छैन । बरु स्वयं सुरक्षा दिनुपर्ने निकायका गृहमन्त्रीज्यू आज त्यही प्रहरी प्रशासन नेविसंघले लगाएको ताला हेरेर बसिरहेको छ । यसतर्फ फेरि म ध्यानाकर्षण गराउन चाहन्छु । प्रधानमन्त्री, शिक्षामन्त्री नै स्वयं विश्वविद्यालयलाई बन्द बनाएर यो मुलुक कसरी सञ्चालन गर्न खोज्नुभएको हो ? विश्वविद्यालयलाई बन्द बनाएर यो देशलाई कहाँ पु¥याउन खोज्नुभएको हो ? यो धेरै गम्भिर विषय छ । यसतर्फ पुनः रुलिङ होस् ।’