नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले चुनावबाट माओवादी बलियो भएर नआएमा प्रतिगमन र प्रतिक्रान्तिको खतरा रहिरहने दाबी गरेका छन् ।

निर्वाचनको व्याटलमा जाने तयारी गर्न युवा विद्यार्थीलाई उनले आग्रह गरे ।

बुधवार काठमाडौंमा पार्टीनिकट अखिल क्रान्तिकारीको ‘क्रान्तिकारी फोस’ घोषणा गर्दै प्रचण्डले चुनावमा माओवादी बलियो शक्ति बनेर आउनुपर्ने बताएका हुन् ।

‘निर्वाचनको ब्याटलमा जाँदैछौं । सडक, सदन र सरकारको ३ वटै मोर्चाबाट संघर्ष गरेर मात्र उपलब्धि हासिल गर्न सकिन्छ,’ युवाहरूलाई प्रचण्डले भने, ‘सडकको हिरो तपाईंहरू हो, तपाईंहरू सडकमा नआउँदासम्म गति लिँदैन । सडक तताउने र गाउँमा अभियान चलाउने कार्यक्रम बन्ने छ ।’

प्रचण्डले निर्वाचन प्रक्रियामा देखिएका कमजोरी सच्याउन जनतामा जानुपर्ने बताए । ‘संविधान बनाउँदा केही रिजर्भेसन राखेका छौं । निर्वाचन प्रणाली र शासकीय स्वरूपमा सुधारको उद्देश्य राखेर जनतामा जानुपर्छ । निर्वाचनमा यदि माओवादी बलियो भएर आउँदैन, प्रतिगमन र प्रतिक्रान्तिको खतरा रहिरहन्छ,’ प्रचण्डले भने ।