एक व्यापारीलाई नियन्त्रणमा लिई ३० लाख रुपैयाँ लुटेको अभियोगमा ३ जना पक्राउ

एक व्यापारीलाई नियन्त्रणमा लिई ३० लाख रुपैयाँभन्दा बढी रकम लुटपाट गरेको अभियोगमा ३ जनालाई प्रहरीले नियन्त्रणमा लिएको छ । काठमाडौंको ठमेलमा सञ्चालित ओरियण्टल मनी एक्सचेन्जका सञ्चालकलाई नियन्त्रणमा लिई उनको साथमा रहेको ३० लाख २३ हजार २०८ रुपैयाँ लुटेको अभियोगमा प्रहरीले उनीहरूलाई नियन्त्रणमा लिएको हो । 

प्रहरीका अनुसार पक्राउ पर्नेमा योगेन्द्र तामाङ, मीनबहादुर तितुङ र देव लामा रहेका छन् । भदौ २२ गते ती व्यापारीलाई पसल बन्द गरी कोठा जाने क्रममा म्हैपी पानीट्यांकीनजिकै पुग्दा ३ वटा मोटरसाइकलमा आएका ५ जना अपरिचित व्यक्तिहरूले जबरजस्ती मोटरसाइकलमा राखी डल्लुमा पुर्‍याई लुटपाट गरेका थिए । उनीहरूले आफूहरू प्रहरी भएको भन्दै ती व्यापारीलाई नियन्त्रणमा लिएका थिए ।  

उनीहरूले ती व्यापारीलाई म्हैपी, सोह्रखुट्टे, खुसिबु हुँदै शोभा भगवतीको पुलमुनिबाट डल्लु पुर्‍याई उनलाई हातपात गर्नुका साथै उनीसँग भएको नगद, आईफोन, लाइसेन्स र ब्लु बुकसमेत रहेको झोला लुटी फरार भएका थिए । 

प्रहरीले उक्त घटनामा प्रयोग गरिएको मोटरसाइकललाई आधार बनाएर अनुसन्धान थालेको थियो । त्यसक्रममा उक्त मोटरसाइकलसहित कपनबाट घटनामा संलग्न ३ जनालाई बुधवार पक्राउ गरिएको प्रहरीले जनाएको छ । 

घटनामा संलग्न अन्य दुई जना फरार रहेकाले खोजी कार्य भइरहेको प्रहरीले जनाएको छ ।