प्रतिनिधि सभाले सर्वोच्च अदालतका प्रधानन्यायाधीश चोलेन्द्रशमशेर जबरासँग बयान लिने काम सम्पन्न गरेको छ । संसद् सचिवालय सिंहदरबारमा शनिवार बसेको बैठकले चोलेन्द्रसँग बयान लिने काम सम्पन्न गरेको हो । समितिले तयार गरेका ४३ प्रश्न र चोलेन्द्रले बयानमा पोलेका व्यक्तिहरूसँगको छलफलका आधारमा पूरक प्रश्न सोधिएको थियो । 

समितिका एक सदस्यका अनुसार चोलेन्द्रले आफूले दिएको बयानको बचाउ गरेका थिए । उनले वकिलहरूले समितिमा आएर झुटो बोलेको दाबी गरेका थिए । समितिबाट न्याय पाउने भन्दै चोलेन्द्र बिदा भएका थिए । चोलेन्द्रले आफूले दिएको बयानको प्रतिमा हस्ताक्षर गरेका छन् । 

चोलेन्द्रसँगको बयान सकेर समितिको बैठक दिउँसो ३ बजेसम्मको लागि स्थगित भएको छ । समितिको सचिवालयलाई प्रतिवेदन लेखनको जिम्मा लगाएर बैठक ३ बजेसम्म स्थगित भएको हो । प्रतिनिधि सभाको कार्यकाल आजै मध्यरातदेखि सकिने भएकाले समितिले प्रतिवेदन आजै सभामुखलाई बुझाउने तयारी गरेको छ । 

अदालतमा भ्रष्टाचारलाई संरक्षण गरेको, मन्त्रिपरिषद्मा भागबण्डा खोजेको लगायत आरोप लगाउँदै सत्तारुढ गठबन्धनले चोलेन्द्रविरुद्ध गत फागुन १ गते महाभियोग दर्ता गराएका थिए । 

त्यसयता चोलेन्द्र निलम्बित अवस्थामा छन् । प्रतिनिधि सभाको कार्यकाल सम्पन्न भएसँगै महाभियोगको हैसियत के हुने भन्नेमा अन्योल छ ।