नेकपा माओवादी केन्द्रका उपाध्यक्ष कृष्णबहादुर महराले राजनीतिक आन्दोलनबाट प्राप्त उपलब्धि रक्षाको लागि पाँच दलीय गठबन्धन जारी राख्नु परेको बताएका छन् ।

अहिले पनि संविधान उल्ट्याउन प्रतिगामीहरुको कोशिस जारी रहेको दावी गर्दै उनले संविधान गणतन्त्र लगायतको उपलब्धि बचाउन पनि गठबन्धन गरिएको बताए ।

नेकपा एमालेप्रति संकेत गर्दै नेता महराले दुई पटकसम्म प्रतिनिधिसभा विघटन गर्नेहरुले नै संविधान कार्यान्वयन गर्न नचाहेको आरोप लगाए । ​परिवर्तन विरोधीहरुले सत्ता लम्ब्याउन गठबन्धन गरेको भन्ने आरोप लगाउनु अर्थहिन भएको उनको भनाइ छ ।

शनिबार रुपन्देहीको लुम्बिनीमा आयोजित जनसभा तथा पार्टी प्रवेश कार्यक्रमलाई सम्बोधन गर्दै पुर्व सभामुख समेत रहेका महराले भने, ‘संविधान कार्यान्वयन गर्न नचाहने तत्वले राष्ट्रपतिलाई प्रयोग गरेर नागरिकता विधेयक प्रमाणीकरणमा अवरोध गरेका छन्, यो राष्ट्रको हित विपरित छ ।’

संविधानको रक्षाको लागि परिवर्तनकारी शक्ति एकजुट हुनुपर्ने उनले भनाइ छ अहिलेको पाँच दलीय गठबन्धन संविधानको रक्षा र प्रतिगमनलाई परास्त गर्ने एकीकृत शक्ति भएको उनले बताए ।

कार्यक्रममा पार्टीका लुम्बिनी प्रदेश इन्चार्ज चक्रपाणी खनालले प्रतिगामिहरु अहिलेको निर्वाचनबाट बढारिने बताए ।