अनुसन्धान गर्ने निकायहरूलाई आयोगको आग्रह : अयोग्य व्यक्ति उम्मेदवार बनेको थाहा भएमा जानकारी दिनुहोला

निर्वाचन आयोगले प्रतिनिधि सभा तथा प्रदेश सभाको निर्वाचनमा मनोनयन दर्ता गरेका व्यक्तिहरूमाथि उजुरी दर्ता भएको वा अनुसन्धानका क्रममा रहेको भए जानकारी गराउन आग्रह गरेको छ । आयोगले कुनै कानूनअनुसार अयोग्य व्यक्तिले उम्मेदवारी दिन लागेको थाहा भएमा जानकारी गराउन नेपाल सरकारअन्तर्गतका अनुसन्धान गर्ने निकायहरूलाई जानकारी दिन आग्रह गरेको हो । 

आफूसँग एकीकृत किसिमको डाटा प्रणाली नरहेको भन्दै आयोगले निर्वाचनमा अयोग्य व्यक्तिको उम्मेदवारी नपरोस् भन्ने मनशायले यस्तो आग्रह गरिएको प्रष्ट पारेको छ । शुक्रवार सञ्चारकर्मीहरूसँग कुराकानी गर्दै आयोगका उपन्यायाधिवक्ता गुरुप्रसाद वाग्लेले अयोग्य व्यक्तिको उम्मेदवारी परेको खण्डमा समयमा नै निर्वाचन आयोग वा मुख्य निर्वाचन अधिकृतको कार्यालयलाई जानकारी गराउन आग्रह गरे । उनले नेपाल प्रहरी, अख्तियार दुरुपयोग अनुसन्धान आयोग, सम्पत्ति शुद्धीकरणलगायतका निकायहरूले उम्मेदवारी दिएका व्यक्तिविरुद्ध मुद्दा परेर अनुसन्धान भइरहेको बारेमा जानकारी गराए आयोगले सक्रिय रुपमा त्यसको छानबिन गरी अयोग्य ठहरिएमा कानूनतः कारबाही गर्ने प्रष्ट पारे । 

‘नेपालमा अनुसन्धान गर्ने निकायहरू भनेको नेपाल प्रहरी, अख्तियार दुरुपयोग अनुसन्धान आयोग, सम्पत्ति शुद्धीकरणलगायत विभिन्न निकायहरू छन् । अनुसन्धान गर्दैगर्दा एकीकृत किसिमको डाटा प्रणाली अर्थात अनुसन्धान गर्दै गरेको कुनै व्यक्तिको बारेमा उम्मेदवारी भयो भने त्यो आयोगको सिस्टमले क्याच गर्नसक्ने वा त्यो मान्छेविरुद्ध उजुरी परेको छ, अनुसन्धान हुँदैछ भनेर सिस्टमले बुझ्ने संयन्त्र छैन । यसको लागि सबै निकायहरूले कुनै पनि अयोग्य व्यक्तिको उम्मेदवारी पर्‍यो भने उम्मेदवारी परिसकेपछि २३ गते नै जसको उम्मेदवारी पर्छ, त्यही दिन बेलुका मुख्य निर्वाचन अधिकृत र निर्वाचन अधिकृतले उम्मेदवारी पर्नेहरूको नामावली सार्वजनिक गर्नुहुन्छ । प्रकाशित नामावली आयोगको वेबसाइट र निर्वाचन अधिकृतको वेबसाइटमा गएर पनि हेर्न सकिन्छ’, उपन्यायधिवक्ता वाग्लेले भने, ‘त्यतिबेला तत्तत् निकायले उहाँहरूले अनुसन्धान गरिरहेको अथवा मुद्दा दायर गरिसकेको कुनै व्यक्तिको उम्मेदवारी परेको छ भने ती निकायहरू पनि सक्रिय भएर समयमा नै निर्वाचन आयोग, मुख्य निर्वाचन अधिकृतको कार्यालयलाई जानकारी गराउनु भयो भने आयोगले सक्रियताका साथ त्यस्ता किसिमका मनोनयन पत्र सक्रिय रुपमा जाँचबुझ गरेर छानबिन गरेर यथेष्ट कारबाही गर्छ ।’

वाग्लेले प्रतिनिधि सभा सदस्य वा प्रदेश सभा सदस्य निर्वाचनमा उम्मेदवारी दिएको कुनैपनि व्यक्ति अयोग्य छ भने त्यही पदमा उम्मेदवारी दिने अर्को व्यक्तिले यथेष्ट प्रमाणसहित उजुरी दिएपछि उजुरी सत्य ठहरिए उम्मेदवारी बदर हुने बताए ।