नेपाली कांग्रेसको तर्फबाट गुल्मीको २ नम्बर क्षेत्रमा बाँगी उम्मेदवारी दिएका डा. दामोदर भुसालले उम्मेदवारी फिर्ता लिएका छन् ।

आइतवारसम्म उम्मेदवारी फिर्ता नलिने अडान लिएका भुसालले सोमवार गठबन्धनकी साझा उम्मेदवार रामकुमारी झाँक्रीलाई समर्थन गरेका हुन् ।

सोमवार सदरमुकाम तम्घासमा झाँक्री, कांग्रेसका जिल्ला सभापति खिलध्वज पन्थी सहितको कार्यक्रममा भुसालले गठबन्धनलाई समर्थन गरेको बताएका हुन् ।

गुल्मी–२ मा गठबन्धनको तर्फबाट नेकपा एसकी सचिव रामकुमारी झाँक्री उम्मेदवार छन् । नेकपा एमालेको तर्फबाट सचिव गोकर्ण विष्ट चुनावी मैदानमा छन् । 

आफूलाई समर्थन गर्ने भुसालसँगको फोटो राख्दै रामकुमारीले ट्वीटरमा लेखेकी छन्, ‘डा. दामोदर भूसाल र म विद्यार्थी राजनीति सँगै गर्‍यौं । काठमाडौंको सडकमा सँगसँगै जुत्ताका तल्ला फटाएको, विद्रोहको झण्डासँगै उठाएको सम्झना ताजै छ । गठबन्धनका कारण गुल्मी–२ मा मैले टिकट पाएँ । उहाँ टिकट लिन योग्य मान्छे हो र पनि गठबन्धनको पक्षमा आफूलाई उभ्याउनुभयो । हामीसँगै छौं ।’