लोकतान्त्रिक समाजवादी पार्टी (लोसपा) ले आफ्नो चुनावी घोषणापत्र सार्वजनिक गरेको छ । आइतबार सार्वजनिक सो पार्टीको चुनावी घोषणापत्रमा १४ प्रतिबद्धता र १३ राजनीतिक अवधारणा प्रस्तुत गरिएको छ । 
विभिन्न ६ परिच्छेदमा विभक्त गरिएको घोषणापत्रको पहिलो परिच्छेदमा अध्यक्ष महन्थ ठाकुरको आह्वान र पृष्ठभूमि समेटिएको छ । यस्तै दोस्रोमा मधेसी दलहरुको टुटफुट र अन्तरघातको चर्चा गरिएको छ भने त्यसपछि संविधान संशोधनका विषयमा स्पष्ट गरिएको छ । लोसपाले संविधान संशोधन अनिवार्य भएको जनाएको छ । 

चौथो परिच्छेदमा पार्टीको राजनीतिक अवधारणा स्पष्ट गरिएको छ भने पाँचौमा पार्टीको प्रतिबद्धता र छैटौँमा पार्टीका नाराहरु समेटिएको छ ।  लोसपाले आफ्नो घोषणापत्रमा सक्षम नेतृत्व, प्रभावकारी सेवा र भ्रष्टाचाररहित स्थानीय सरकारमा प्रतिबद्धता जनाएको छ । यसैगरी पार्टीले व्यवहारिक शिक्षाको विकास, स्वस्थ नागरिक एवम् समृद्ध देश, महिला सशक्तीकरण, कृषिको आधुनिकीकरण, चुरे संरक्षण, जेष्ठ नागरिकको सम्मान, युवा सशक्तीकरण एवम् उद्यमशीलता प्रवर्द्धन, प्रभावकारी विपद् व्यवस्थापन, भौतिक पूर्वाधारको विकासमा जोड दिएको छ । 

जनकपुरलाई अन्तर्राष्ट्रिय पर्यटन एवम् विश्व हिन्दूको केन्द्र बनाउने, वीरगन्जलाई मधेस प्रदेशको आर्थिक कारोबारको केन्द्र बनाउने, विराटनगर, भैरहवा र नेपालगन्जलाई आर्थिक विकासको मेरुदण्ड बनाउने र लुम्बिनीलाई बुद्ध धर्मावलम्बीहरुका लागि अन्तर्राष्ट्रिय तीर्थस्थल एवम् ध्यानकेन्द्रको रुपमा विकास गर्ने लोसपाले प्रतिबद्धता जनाएको छ । 

यसैगरी लोकतन्त्रको रक्षा गर्ने, नेपाललाई एक बहुराष्ट्रिय राज्य बनाउने, पहिचानसहितको संघीयताको पक्षमा वकालत गर्ने, लोकतान्त्रिक समाजवादीको सिद्धान्त अंगीकार गर्ने, समानुपातिक प्रतिनिधित्व, संसदीय व्यवस्थाको निरन्तरता, मिश्रित निर्वाचन प्रणालीको निरन्तरता, समावेशी र समतामूलक राज्यवस्था, व्यवहारिक विदेश नीति, मिश्रित अर्थनीति, सुशासन र भ्रष्टाचारमुक्त समाज र पर्यावरणीय सन्तुलनलाई पार्टीले आफ्नो राजनीतिक अवधारणामा समेटेको छ ।