काठमाडौं–२ मा सत्ता गठबन्धनकी साझा उम्मेदवार ओनसरी घर्तीले चुनावी घोषणापत्र सार्वजनिक गरेकी छन् । 

मंगलबार सार्वजनिक गरिएको घोषणा पत्रमा कोटेश्वर क्षेत्रको ट्राफिक जाम हटाउनको लागि जडिबुटीदेखि तीनकुनेसम्म अण्डर पास निर्माण गर्ने, त्रिभुवन विमानस्थलको मुनि सुरुङमार्ग बनाउने लगायतका ठूला र महत्वकांक्षी योजना समावेश गरिएका छन् ।

विमानस्थल मुनी सुरूङमार्ग बनाएर पेप्सीकोला–सिनामंगल सिधा आवतजावतको व्यवस्था मिलाउने प्रतिवद्धता घर्तीले घोषणा पत्रमा उल्लेख गरेकी छिन् । 

त्यसैगरी, साँखु–फड्केश्वर सडकलाई पूर्णता दिई मध्यपहाडी लोकमार्ग सडकसँग जोड्ने योजना पनि घर्तीको चुनावी घोषणा पत्रमा उल्लेख छ ।  

त्यसबाहेक, साँखु–बज्रयोगिनी–घुमारचोक–डाँडाकटेरी–चौही भञ्ज्याङ–धारापानी–पटाप–कुण्डेश्वर हुँदै सिन्धुपाल्चोक जोड्ने सडक निर्माणलाई पूर्णता दिने घोषणा उनले गरेकी छन् ।

काठमाडौं–२ मा पुर्वाधारका ठूला आयोजना विकासको प्रतिवद्धता घोषणा पत्रमा उल्लेख गरिएको छ । 

घर्तीले चावहिल–साँखु सडकलाई मापदण्ड अनुसार यथाशीघ्र निर्माण सम्पन्न गराउने, शाली नदी–मनोहरा–मूलपानी–हरहर महादेव–पेप्सीकोला–नरेफाँट–बालकुमारी हुँदै मनोहरा करिडोर निर्माण गर्ने प्रतिबद्धता व्यक्त गरेकी छिन् । 

त्यसैगरी, जहरसिंहपौवामा सुविधा सम्पन्न अस्पताल निर्माण गर्ने योजन पनि घर्तीको घोषणा पत्रमा उल्लेख छ ।