माओवादी केन्द्रले सरकार गठनका लागि सबै विकल्प खुल्ला रहेको बताएको छ । 

शनिबार पार्टी कार्यालय पेरिसडाडामा बसेको पदाधिकारी बैठकपछि उपाध्यक्ष कृष्णबहादुर महराले माओवादी केन्द्रको नेतृत्वमा सरकार गठनको सबै विकल्प खुल्ला रहेको प्रतिक्रिया दिएका हुन् । 

सरकार गठनका लागि एमालेसहितका दलहरूसँग छलफल गरेर अघि बढ्न सकिने उनले बताए । 

बैठकमा नेताहरूले प्रतिनिधिसभा र प्रदेशसभा निर्वाचनको परिणाम अपेक्षा अनुसार नआएको विश्लेषण सुनाएको महराले बताए । 

माओवादी केन्द्रका  महासचिव देव गुरुङले अहिले गठबन्धनमै रहेकाले गठबन्धनकै सरकार गठनको पहल हुने बताए । तर, एमालेसँग पनि सरकार गठनका विषयमा वार्ता र संवाद हुनसक्ने उनले बताए ।

राजनीतिक कोर्ष जता पनि जान सक्ने भएकाले अहिल्यै भावी यात्राबारे यकिन गर्न नसकिने गुरूङको भनाई छ । 

उपाध्यक्ष महराले भने, ‘निर्वाचनको प्रारम्भिक समीक्षा गरियो । अपेक्षा गरिए अनुसार हामीले संघमा सिट हासिल गर्न सकिएन भन्ने समीक्षा भयो । समग्रमा चुनावको सबै परिणाम आएपछि मात्रै विस्तृतमा विश्लेषण गर्ने कुरा गरियो ।’

अहिले गठबन्धन छाड्ने निर्णय नभएको र अन्य विकल्प पनि खुला राखिएको महराले बताए । ‘विभिन्न विकल्पमा जान सकिन्छ । तर, पुरानो गठबन्धनलाई छोड्ने, तोड्ने निर्णय भएको छैन’, महराले भने ।

पार्टीको पदाधिकारीकी बैठक पुनः बोलाइएको र  उक्त बैठकले निर्वाचनको नतिजाको समीक्षा गरेर आगामी योजनाको बारेमा ठोस निर्णय गर्ने माओवादी केन्द्रका नेताहरुले बताएका छन् ।