कांग्रेस संसदीय दलको नेताको चुनावमा उम्मेदवारी दर्ता गरेसँगै शेरबहादुर देउवा र गगन थापा सांसदलाई फकाउने प्रयासमा लागेका छन् । कांग्रेस संसदीय दलको नेताका लागि सभापति शेरबहादुर देउवा र महामन्त्री गगन थापाले उम्मेदवारी दर्ता गरेका छन् । 

संसदीय दलको नेता बन्न ५१ प्रतिशत मत ल्याउनुपर्छ । प्रत्यक्ष र सामानुपातिकतर्फ गरी प्रतिनिधिसभामा कांग्रेसको ८९ सीट छ । त्यसमध्ये, संसदीय दलको चुनाव जित्ने उम्मेदवारले कम्तिमा ४५ मत ल्याउनुपर्छ ।

कांग्रेसमा संस्थापन खेमाका ५५ जना सांसद छन् । त्यसैगरी, संस्थापत इतरका गगन थापालाई समर्थन गर्ने ३४ जना सांसद छन् । 

शेरबहादुर देउवाले आफ्ना पक्षका सांसदको मत जोगाउन सक्दा चुनाव जित्छन् । तर, गगन थापाले भने संसदीय दलको नेता जित्नका लागि कम्तिमा ११ मत संस्थापन पक्षबाट आफूतर्फ ल्याउनुपर्छ ।

गगनले पार्टीमा रूपान्तरण र पुस्तान्तरणको एजेण्डा अघि सारेर संसदीय दलको नेतामा उम्मेदवारी दर्ता गराएका छन् । उनलाई कांग्रेसका युवा नेताहरूको समर्थन छ । 

कांग्रेसका अर्का महामन्त्री विश्वप्रकाश शर्मा र युवा नेता प्रदीप पौडेलले पनि थापालाई नै सघाइरहेका छन् । त्यसबाहेक, उपसभापति धनराज गुरूङ, डा. शेखर कोइराला, चन्द्र भण्डारी, दिलेन्द्रप्रसाद बडू, अर्जुनरसिंह केसीलगायतको समर्थन छ । 

उता शेरबहादुर देउवालाई भने कांग्रेसका उपसभापति पूर्णबहादुर खड्का, अर्का नेता रामचन्द्र पौडेल, डा. प्रकाशशरण महतलगायतको समर्थन छ । 

उम्मेदवारी दर्ता भएसँगै दुवै उम्मेदवारहरू सांसदहरूलाई आफ्नो पक्षमा पार्ने प्रयासमा लागेका छन् । 

शेरबहादुर देउवाले त केही दिनअघि देखि नै सबै सांसदहरूलाई पालैपालो बालुवाटारमा बोलाएर सहयोग मागिरहेका छन् । उनले कतिपयलाई मन्त्री र राजीतिक नियुक्तिमार्फत कार्यकर्ता व्यवस्थापनमा सघाउने वचन दिएका छन् । 

यता संस्थापन इतर खेमाले पनि शीर्ष तहका नेताहरूमार्फत सांसद फकाउने प्रयास गरिरहेको उनीहरूनिकट स्रोत बताउँछ ।