कर्णाली प्रदेशका मुख्यमन्त्री जीवनबहादुर शाहीले निर्वाचन आचारसंहिताका कारण सोचेजस्तो काम गर्न नसकेको बताएका छन् ।

आफ्नो कार्यकालमा हासिल भएका उपलब्धिहरू सार्वजनिक गर्दै उनले स्थानीय र प्रदेश तथा प्रतिनिधिसभा निर्वाचन आचारसंहिताका कारण छोटो समयमा थोरै तर केही महत्त्वपूर्ण कामको शुरूआत गरेको बताए । 

शाही २०७८ कात्तिक १६ गते मुख्यमन्त्री नियुक्त भएका थिए । ‘संयोगवश मुख्यमन्त्री हुने वित्तिकै स्थानीय तहको निर्वाचन शुरू भयो, पछि प्रदेश र प्रतिनिधिसभा निर्वाचन भयो, १२० दिनजति त निर्वाचन आचारसंहिताले काम गर्न दिएन,’ मुख्यमन्त्री कार्यालयमा मंगलवार पत्रकार सम्मेलन आयोजना गर्दै उनले भने, ‘छोटो समयमा मेरो नेतृत्वमा देखिने गरेर केही परिवर्तनहरू भएका छन् ।’ मुख्यमन्त्री शाहीले स्थानीय तह र प्रदेशबीच सम्बन्ध बढाउनुका साथै प्रतिपक्षी दलसँग सम्बन्ध सुधार गरी संसद सञ्चालन गरेको, स्वास्थ्य र शिक्षा क्षेत्र सुधारमा केन्द्रित भएको जनाए । उनले प्रदेशको विकास र समृद्धिको आधारको रूपमा ६ ‘ब’ वन, बाटो, बजार, बिजुली, विचार र व्यवस्थापनलाई प्रदेश सरकारको प्राथमिकतामा पारेको बताउँदै भने, ‘यसलाई नीति, योजना र कार्यक्रममा इमान्दारितापूर्वक अघि बढाएको छु ।’

केही ठूला पूर्वाधार र केही साना तर सुशासनका दृष्टिले अति महत्त्वपूर्ण कामहरू व्यवस्थित गरिएको उनको दाबी छ । देशको ठूलो खेलकुद प्रतियोगिता दशौं राष्ट्रिय खेलकुदलाई कर्णालीमा आयोजना गर्नका लागि पूर्वाधार निर्माणलाई तीव्रता दिइएको मुख्यमन्त्री शाहीको भनाई छ ।

‘प्रदेश गौरवको आयोजनाका रूपमा रंगशाला निर्माण भइरहेको छ, रंगशाला शिलान्यासदेखि ३४ पटकसम्म स्वयं स्थलगत अनुगमनमा गएको छु,’ उनले भने, ‘नेपालमै पहिलोपटक भलिबलको कभर्डहल निर्माण भइरहेको छ, प्रदेश रंगशालाको भौतिक पूर्वाधारको ३३ प्रतिशत काम सम्पन्न भएको छ ।’

मुख्यमन्त्री शाहीका अनुसार प्रदेश सरकारको प्रभावकारी काम कारबाहीका लागि निजामती सेवा सम्बन्धी विधेयक लगायत १२ वटा विधेयक तर्जुमा गरी प्रदेश सभामा प्रस्तुत गरिएका छन् । विशेष कार्यक्रमको नाममा मुख्यमन्त्री तथा मन्त्रिपरिषद्को कार्यालय र विषयगत मन्त्रालयमा एकमुष्ट रकम विनियोजन गर्ने परिपाटीलाई चालू आर्थिक वर्षमा अन्त्य गरी त्यस्ता कार्यक्रमहरू विषयगत मन्त्रालय तथा सम्बन्धित स्थानीय तहमा पठाइएको छ ।

खोप, परिवार नियोजन, सुरक्षित मातृत्व, बालरोग व्यवस्थापन, महामारी रोग नियन्त्रण एवं उपचारात्मक सेवाका सूचकहरूमा सुधार भएको छ । पूर्ण खोप कभरेज ७४ प्रतिशतबाट ९० प्रतिशत पुगेको छ । ६ महिनासम्म स्तनपान गराउने आमाको संख्या ६२ प्रतिशतबाट बढेर ७५ प्रतिशत पुगेको मुख्यमन्त्रीद्वारा सार्वजनिक प्रगति विवरणमा उल्लेख छ ।