सिस्टममा खराबी आएपछि अमेरिकामा सबै उडान ठप्प

नोटिस टु एयर मिसन प्रणालीमा त्रुटिका कारण बुधबार अमेरिकामा सबै उडानहरू ठप्प भएका छन्।

न्युयोर्क टाइम्सको रिपोर्टअनुसार हालसम्म २५१२ उडान ढिला भएका छन् । २५४ आन्तरिक तथा अन्तर्राष्ट्रिय उडान रद्द भएका हुन्। यसबारे त्यहाँको नागरिक उड्डयनको वेबसाइटले पुष्टि गरेको छ। राष्ट्रपति जो बाइडेनले यसबारे प्रतिवेदन मागेकाछन्। अमेरिकी इतिहासमा यस्तो भएको पहिलो घटना हो। ​

ह्वाइट हाउसले भन्यो– साइबर आक्रमण होइन

अमेरिकी इतिहासमा पहिलो पटक यति ठूलो प्राविधिक गडबडी भएपछि ह्वाइट हाउसको वक्तव्य पनि आएको छ । एनबीसी न्यूजले प्रेस सेक्रेटरी क्यारिन जीन पियरेलाई उद्धृत गर्दै भनेको छ- ट्रान्सपोर्टेशन सेक्रेटरीले केही समयअघि राष्ट्रपति जो बाइडेनलाई भेटेका थिए। उनले यो समस्याबारे राष्ट्रपतिलाई जानकारी गराएका थिए । अहिलेसम्मको अनुसन्धानका आधारमा यो साइबर हमलाको घटना होइन भन्न सक्छौँ तर राष्ट्रपतिले यस विषयमा गहिरो र गम्भीर छानबिन गर्न निर्देशन दिनुभएको छ ।'

अमेरिकाको संघीय उड्डयन एजेन्सीले नोटिस टु एयर मिसन प्रणाली ‘फेल’ भएको जनाएको छ। तर कहिले ठिक हुन्छ भन्न नसकिने अवस्था रहेको उसले जनाएको छ। 

एनबीसी न्यूजका अनुसार करिब ४ सय उडान ढिला भएका छन्। जसमा स्वदेशी र विदेशी उडानहरू समावेश छन्। अमेरिकी समय अनुसार बिहान ५ बजेर ३१ मिनेटमा यो प्राविधिक गडबडी बाहिर आएको हो । तर, अहिलेसम्म यसको कारण के हो भन्ने खुलेको छैन । उड्डयनको वेबसाइटमा 'प्राविधिक कर्मचारी प्रणाली मर्मतमा व्यस्त छन्' लेखिएको छ।