नेपाली कांग्रेसका वरिष्ठ नेता रामचन्द्र पौडेलले सभामुख रहेको समयमा आफू एमाले विभाजनको निर्णय गर्ने पक्षमा नरहेको बताएका छन् ।

लोकतन्त्र कलिलै रहेकोले राजनीतिक दलहरू फुट्नु हुँदेन भन्ने आफ्नो मान्यता र अडान रहेको उनले स्मरण गरे । 

प्रतिनिधि सभामा मंगलबार नवनिर्वाचित सभामुख र उपसभामुखलाई बधाई दिने क्रममा पौडेलले कहिलेकाहीँ सभामुखमाथि अनावश्यक आरोप लाग्ने गरेको बताएका हुन् । ‘म सभामुख रहेको समयमा महाकाली सन्धिलाई लिएर एमाले विभाजनको डिलमा पुग्यो । कतिपयले मलाइ तत्काल निर्णय गर्न दबाब दिएका थिए ।

त्यहीबेला म सुदूरपश्चिम जाँदा आफ्नै अनुभव छ । म कर्णालीको पुलको माझमा पुगेपछि यहिबाट फर्किनुपर्छ भन्ने कुरा आयो’, २५ वर्षअघिको घटना स्मरण गर्दै पौडेलले भने, ‘म फर्किन्न भन्ने अडान राखे । धनगढी र महेन्द्रनगरको कार्यक्रम सकेपछि मात्र फर्किन्छु भने । महेन्द्रनगरको मञ्चबाट ओर्लिँदा हेलिकप्टेरमा आएको रहेछ । भएको सुविधा प्रयोग गरौं भनेर म हेलिकप्टरमा आँएको थिएँ । तर एमाले फोड्न दौडेर आयो भन्ने आरोप लाग्यो । सभामुखलाई बेलाबखत यस्ता आरोप लाग्छ, यस्तो पनि फेस गर्नुपर्छ ।’

२०५१ सालको प्रतिनिधि सभाको कालखण्डमा रामचन्द्र पौडेल सभामुख थिए । २०५४ सालमा एमाले विभाजन भएको थियो । पक्ष र विपक्षको सन्तुलन मिलाएर लैजाने कुरा अति नै अप्ठेरो रहेको भन्दै पौडेलले नवनिर्वाचित सभामुख देवराज घिमिरेलाई यो काममा सफल हुने विश्वास व्यक्त गरे ।