कांग्रेस नेता गगन थापाले राष्ट्रपतिको सवारीका क्रममा चिकित्सकमाथि आक्रमण हुनु अशोभनीय र दुःखद् भएको बताएका छन् ।

सामाजिक संजालमा लेख्दै थापाले नागरिकलाई कुनै असुविधा नहुने गरी कार्यविधि बनाउन माग गरेका हुन् । 

‘हिजो राष्ट्रपतिको सवारीमा क्रममा चिकित्सकमाथि भएको आक्रमण अशोभनीय र दुःखद छ। दोषीलाई कारबाहीका मागमा सरकारबाट तत्काल सुनुवाइ हुनपर्छ’, थापाले भनेका छन्, ‘विशिष्ट व्यक्तिको सवारीमा सुरक्षा व्यवस्थापन गर्ने नाममा सडक खाली गराएर नागरिकलाई घण्टौँसम्म हिँडडुल गर्न नदिने अभ्यास परम्पराको नाममा चलिरहेको छ। यो शैलीप्रति हरेक पटक हामी आक्रोश पोख्छौँ अनि बिर्सिन्छौँ। यो पटक पनि त्यस्तै हुन्छ। तर यस्तो दोहोरिन नदिने हो भने केही काम गर्नुपर्ने छ।’

राष्ट्रपति व्यक्तिभन्दा पनि संस्था भएको भन्दै उनले नकारात्मक धारणालाई परिवर्तन गर्न पनि दुःख दिने परम्परा र शैलीलाई बदल्नुपर्ने बताएका हुन् ।

‘राष्ट्रपति एउटा व्यक्ति होइन संस्था हो। यो संस्थाप्रति नागरिकको धारणा नकारात्मक हुँदै गएको छ । यसको एउटा कारण तामझामवाला शैली हो। संस्थालाई सम्मानित र मर्यादित बनाउन नागरिकलाई दुःख दिने यो परम्परा र शैली बदलौँ,’ थापाले लेखेका छन्।