महिनावारी सुकेको ५ वर्षपछि काठमाडौंकी एक महिलाले आइभिएफ प्रविधिबाट जुम्ल्याहा सन्तान जन्माउन सफल भएकी छिन् । 

थापाथलीस्थित नर्भिक इन्टरनेशनल हस्पिटलअन्तर्गतको नर्भिक आइभिएफ सेन्टरमा उपचार गराइरहेकी ५२ वर्षीया ती महिलाले आइभिएफ प्रविधिमार्फत एकैसाथ दुई सन्तानलाई जन्म दिएकी हुन् । 
बढ्दो उमेर समूहमा जोखिम बढी हुनसक्ने अवस्थालाई मध्यनजर गर्दै गर्भाअवस्थादेखि नै उनलाई उच्च निगरानीमा राखेर उपचार गरिएको थियो । शल्यक्रियामार्फत जन्मिएका दुवै जना सन्तान र आमाको अवस्था राम्रो रहेको नर्भिककी वरिष्ठ टेस्टट्युब बेबी विशेषज्ञ डा. नूतन शर्माले बताइन् । 

सामान्यतः बढ्दो उमेर समूहका महिलामा गर्भधारण गर्ने र सन्तान जन्माउन सक्ने अवस्थालाई जटिल रुपमा हेर्ने गरिन्छ । 

डा. शर्माका अनुसार ती महिलाको महिनावारी समेत सुकिसकेको र पाठेघरमा मासु पलाएको थियो । पछि शल्यक्रियामार्फत पाठेघरको मासु झिकेर आइभिएफ प्रविधिबाट उपचार गरिएको थियो । 

यसअघि पनि ५५ वर्षीय महिलाले नर्भिकमै आइभिएफ प्रविधिमार्फत सन्तान प्राप्त गरेकी थिइन् । 

सामान्यतः नेपालको सन्दर्भमा सन्तान जन्माउनका लागि ३० वर्षको उमेर समूहलाई उत्तम मानिने गरिन्छ ।  तर विभिन्न कारणले बढी उमेर समूह भएका महिलाले सन्तानको रहर गर्ने भएकाले उमेरलाई मात्र बाधक मान्न नसकिने नर्भिक अस्पतालले जनाएको छ ।

अस्पतालका विज्ञहरूका अनुसार पछिल्लो ६ महिनामा नर्भिकमा आइभिएफ गरेका मध्ये गर्भाधारण गर्न सफल ६१ जना महिला ४६ देखि ५५ वर्ष उमेर समूहका रहेका छन् । त्यसैले सन्तान प्राप्तिको चाहनामा उमेरलाई बाधक मान्न आवश्यक नभएको अस्पतालले जनाएको छ ।