सर्वोच्च अदालतको प्रधानन्यायाधीशमा सिफारिस कामु प्रधानन्यायाधीश हरिकृष्ण कार्कीको संसदीय सुनुवाइ प्रक्रिया चलिरहेको समयमा न्याय परिषद्ले उनको अवकाश हुने पत्र दिएको छ । 

परिषद्ले आइतबार सर्वोच्च अदालत, कानुन मन्त्रालय, राष्ट्रिय किताबखाना लगायतलाई बोधार्थ पत्र लेख्दै कार्कीको अवकाशको पत्र कार्कीलाई दिएको हो । 

न्याय परिषद्का सहसचिव मानबहादुर कार्कीले हस्ताक्षर गरेको पत्रमा कामु प्रधानन्यायाधीशले आगामी साउन २० गते उमेर हदका कारण अनिवार्य अवकाश पाउने जानकारी गराएका हुन् । सहसचिव कार्कीले अवकाश पाउनु २ महिना अगाडि यस्तो पत्र दिने प्रचलन रहेको लोकान्तरलाई बताए । 

कामु प्रधानन्यायाधीश कार्कीको सुनुवाइ संसदीय सुनुवाइ विशेष समितिमा चलिरहेको छ । उनीमाथि परेका उजुरी सम्बन्धमा सोमवार सुनुवाइ समितिमा छलफल हुँदै छ । संसदीय सुनुवाइ समितिले अनुमोदन गरे पनि कार्कीको कार्यकाल छोटो हुने भएको छ । 

संवैधानिक परिषद्ले गत वैशाख २५ गते कार्कीलाई प्रधानन्यायाधीश नियुक्तिका लागि सिफारिस गरेको थियो । संसदीय सुनुवाइबाट अनुमोदन भएमा मात्र उनलाई राष्ट्रपतिले प्रधानन्यायाधीश नियुक्त गर्नेछन् ।