परराष्ट्र मन्त्रालयअन्तर्गतको राहदानी विभागले बिहीवार सार्वजनिक बिदा परेकाले पासपोर्ट (राहदानी) लिने काम पछिलाई सरेको जनाएको छ ।

विभागले बुधवार एक विज्ञप्ति जारी गर्दै बिहीवारका लागि राहदानी पाउन निश्चित भएकाले शुक्रबार वा त्यसपछिका दिनहरूमा लिन आग्रह गरेको छ ।

यद्यपि, एसएमएस आएका आवेदकहरूले भने शुक्रवार नै राहदानी लिन आउन विभागले अनुरोध गरेको छ ।

संविधानसभाका अध्यक्ष सुवास नेम्वाङको अन्त्येष्टिका दिन बिहीवार सार्वजनिक विदा दिने सरकारले निर्णय गरेको छ । 

उक्त दिन देशभरका सरकारी कार्यालयहरू, विदेशस्थित नेपाली दूतावास र नियोगहरूमा आधा झण्डा निर्णय भएको गृह मन्त्रालयले जनाएको छ ।

एमालेका उपाध्यक्षसमेत रहेका नेम्वाङले संविधान निर्माण र गणतन्त्र स्थापनामा खेलेको भूमिकाको कदर गर्दै यस्तो निर्णय गरिएको गृहले जनाएको छ ।

मंगलवार बसेको मन्त्रिपरिषद्को आकस्मिक बैठकले पनि नेम्वाङको अन्त्येष्टि हुने दिन (बुधवार वा बिहीवार) सार्वजनिक बिदा दिने निर्णय गरेको हो । गृहले पछि बिहीवारलाई मिति तोकेको हो । 

पूर्वसभामुखसमेत रहेका नेम्वाङको ७१ वर्षको उमेरमा सोमवार राति निधन भएको थियो ।