राष्ट्रिय गानप्रति केपी ओलीको त्यो आपत्तिजनक अभिव्यक्ति र आजको विस्मृत

​गत चैतमा वीरगन्जमा आयोजित एक कार्यक्रममा नेकपा एमालेका अध्यक्ष केपी शर्मा ओलीले राष्ट्रिय गानका विषयमा एउटा अभिव्यक्ति दिएका थिए । उनको त्यो अभिव्यक्ति निकै आपत्तिजनक थियो । ‘राष्ट्रिय गान अगाडि ‘प्याँ प्याँ प्याँ प्याँ धुन बजाउँछ । सयौं थुंगा फूलका हामी भन्नुभन्दा अगाडिको धुन राष्ट्रिय गानबाट हटाइनुपर्दछ’ उनले भनेका थिए । 

त्यो धुन राष्ट्रिय गानभित्र नपर्ने पनि उनले सोही कार्यक्रममा बताएका थिए ।

आफू र आफ्नो पार्टीमात्रै ठूलो राष्ट्रवादी भएको उनीभित्र एउटा हठ छ ।

भारतीय नाकाबन्दीको डटेर सामना गरिएको दाबीसहित ओलीले त्यसपछि आफूलाई ठूलो राष्ट्रवादी बताउँदै आएका छन् ।

तर बुधवार मोरङको विराटनगरमा भएको कार्यक्रममा एमालेले राष्ट्रिय गान बजाउन आवश्यक ठानेन ।

कार्यक्रममा १ घण्टा २१ मिनेट भाषण गरेका ओलीले धेरै पटक एमाले मात्रै राष्ट्रवादी भएको भन्न भ्याए ।

तर उनले राष्ट्र गानलाई भने बिर्सेको भान भयो ।

११ बजेका लागि आयोजना गरिएको कार्यक्रम १२ बजेपछि मात्रै शुरू भएको थियो ।

निवर्तमान अध्यक्ष तुलसीप्रसाद न्यौपानेले सञ्चालन गरेको कार्यक्रममा निश्चित व्यक्तिलाई मात्रै अतिथि राखिएको थियो ।

एमालेका सचिव तथा कोशी प्रदेशका इन्चार्ज रघुवीर महासेठले नव निर्वाचित पदाधिकारी तथा सदस्यहरूलाई शपथग्रहण गराएका थिए ।

आसन ग्रहण पछाडि शहीदहरूलाई सम्झेको एमालेले राष्ट्र गानलाई भने भुलेको थियो ।

शपथ ग्रहणपछि अध्यक्ष ओलीको भाषण शुरू भयो । उनले १ घण्टा २१ मिनेट आफू सरकारमा हुँदा गरेका कामको प्रशंसा गरे ।

उनले सरकार छोड्नु पर्दाको पीडा समेत कार्यकर्तालाई सुनाए ।

अधिकांश समय आफ्नै सरकारमा हुँदा गरेका कामको  प्रशंसा उनले गरेका थिए ।

यस्तै ओलीले केही समय अरू पाटीका नेताहरूको खिल्ली उडाउन पनि खर्चिए ।

दुई वर्ष अगाडिको स्मरण गर्दै उनले पार्टीभित्रका मधु–कैटभले दिनुसम्म दुःख दिएको बताए ।

नेकपा कालमा एउटै पार्टीमा रहेका पुष्पकमल दाहाल ‘प्रचण्ड’ र नेता माधवकुमार नेपाललाई ओलीले मधु–कैटभ भन्ने गरेका छन् ।​​

कांग्रेसका लागि भने उनले लामो समय नै खर्चिएका थिए ।

उनले नेपाली कांग्रेस विचारविनाको पार्टी भएको बताए । महाधिवेशनमा एउटै दस्ताबेज तथा कुनै विचार नआएको बताए ।

नेता चयन मात्रै गरेको उनको आरोप छ । ‘महाधिवेशनमा सभापति छान्ने । किन छान्ने भन्दा परिवारको कल्याण गर्न । गोप्य कुरा गर्न भन्न नमिल्ने भएकाले कांग्रेस भित्र नीति विचारमा छलफल हुँदैन’ उनले भने ।

अध्यक्ष ओलीले रास्वपाप्रति पनि आफ्नो आक्रोश पोखे । नयाँ भन्नेहरूले केही पनि नगरको  उनले बताए । ‘नयाँ भन्नेहरूले कुनै पनि आन्दोलनमा नलडेको बताएका छन् । २००७ सालको आन्दोलन लडे ।  २०३६ सालको आन्दोलन गरेका हुन  । ३६ सालमा कोही जन्मेकै थिएनन् । २०४६ सालमा केही केही भर्खर जन्मेका थिए होला । २०६२/०६३ सालको आन्दोलन पनि लडेनन् । संविधान लेख्ने कुरामा उनीहरूको केही योगदान छैन’ उनले भने ।
यो हिन्दी गीत जस्तो नभएको उनले बताए । तुम आए बार आए भने जस्तो दुई चार जना केटाकेटी हिड्दैमा बार आउँदैन ।

उनले देश चलाउने कुरा  सिनेमा हलको जस्तो नभएको पनि बताएका छन् । ‘यो देश बनाउने कुरा हो । एक छिन सिनेमा हेरेर केटाकेटी आए जस्तो कुरा होइन,’ उनले भने, ‘अब कसले दिन्छ यिनीहरूलाई भोट ।’