नेपाली काँग्रेसका महामन्त्री विश्वप्रकाश शर्माले राजनीतिक दलहरुले मिसन २०८४ नभई देश बनाउने मिसनमा लाग्नुपर्ने बताएका छन् । 

नेपाली काँग्रेस भक्तपुर नगर समितिको १४ औँ नगर सम्मेलनको आज उद्घाटन गर्दै उनले केही राजनीतिक दल र नेताहरुले मिसन २०८४ को नारा दिएर लोकतान्त्रिक व्यवस्थाकै खिल्ली उडाएको बताए ।

“मिसन २०८४ को नारा दिएर अहिले केही दल र व्यक्तिले यो व्यवस्थालाई नै खिल्ली उडाउने प्रयास गरिरहेका छन्, हामीले अब चुनाबको चिन्ता होइन, देशको चिन्ता गर्नुपर्छ, यस्ता चुनावी मिसन त हामीले २०४६ सालदेखि अहिलेसम्म धेरै लडिसक्यौँ,” महामन्त्री शर्माले भने, “म सम्पूर्ण लोकतान्त्रिक शक्तिलाई के भन्न चाहन्छु भने चुनाबको अब चिन्ता छाडौँ, देशको चिन्ता गरौँ, देश बनाउने साझा मुद्दामा लागौँ ।”

कांग्रेसका केन्द्रदेखि गाउँ तहसम्मका नेता तथा कार्यकर्ताले बाटो बिराएको हो कि भन्ने गुनासो बढिरहेको सुनाउँदै महामन्त्री शर्माले राष्ट्रियता र संसदीय व्यवस्थाको विपक्षमा पार्टीले कुनै पनि सम्झौता नगर्ने बताउए । कार्यक्रममा कांग्रेसका बागमती प्रदेश सभापति इन्द्र बानियाँ, पार्टीका भक्तपुर सभापति एवं प्रतिनिधिसभा सांसद दुर्लभ थापालगायतले कांग्रेसलाई गाउँ, नगर र जिल्ला तहबाटै मजबुद बनाएर लैजान कांग्रेस एक हुनुपर्ने बताए ।