नेपाली कांग्रेसका महामन्त्री विश्वप्रकाश शर्माले देश बनाउने स्पष्ट भिजन ०९४ शुरू गर्नुपर्ने बताएका छन् ।

नेपाली कांग्रेसको भक्तपुर जिल्ला शाखाले आज आयोजना गरेको ४८औं राष्ट्रिय एकता तथा मेलमिलाप दिवसका अवसरमा आयोजित प्रवचन कार्यक्रमलाई सम्बोधन गर्दै उनले यस्तो बताएका हुन् ।​

चुनावी नारा मिसन ०८४ छाडेर सबै दल समृद्धिका लागि केन्द्रित हुन भिजन ०९४ अभियान सञ्चालन गर्नु आवश्यक रहेको उनको भनाइ थियो। आगामी चुनावको चिन्ता छाडेर देश बनाउने साझा मुद्दामा लाग्न सबै दललाई उनले आग्रह गरेका छन् ।

अवसरका पदमा पटक-पटक दोहरिने परम्परा अब अन्त्य गर्नुपर्ने भन्दै महामन्त्री शर्माले भने, ‘पटक-पटक एउटै पदमा एउटै व्यक्ति दोहरिने परम्परा हटाउनैपर्छ, राष्ट्रपति एकपटक, प्रधानमन्त्री दुईपटक, मन्त्री तीनपटक र सांसद चारपटकभन्दा बढी दोहरिन दिन हुँदैन ।’

संविधान सहमतिको साझा दस्तावेज भएको उल्लेख गर्दै उनले दलबीचको सहकार्यले शान्ति प्रक्रियाका बाँकी काम पूरा गरी संविधानप्रति अपनत्वको दायरा बढाउँदै सम्मुन्नतिको यात्रामा लम्कनुपर्नेमा जोड दिए ।