प्रमुख प्रतिपक्षी दल नेकपा (एमाले)ले भारतीय विदेशमन्त्री एस जयशंकर नेपाल भ्रमणमा आउँदा के–के सहमति भएको हो जानकारी गराउन सरकारसँग माग गरेको छ । 

प्रमुख प्रतिपक्षीलाई पनि जानकारी नगराइ सरकारले भारतसँग सहमति गरेको आरोप एमालेले लगाएको छ । 

शुक्रवार पार्टीको केन्द्रीय कार्यालय ललितपुरको च्यासलमा बसेको सचिवालयको बैठकले यस्तो माग गरेको महासचिव शंकर पोखरेलले जानकारी दिए ।

‘सत्तापक्षले प्रतिपक्षीलाई विश्वासमा लिनुपर्ने हो । यसरी उच्चस्तरको भ्रमण हुँदा प्रमुख प्रतिपक्षीलाई जानकारी गराउनुपर्ने हो । तर सरकारले यस्तो केही नगराएको विषयमा हामीले आलोचना गरेका छौं,’ महासचिव पोखरेलले बैठकपछि सञ्चारकर्मीहरूसँग भने, ‘भारतीय विदेशमन्त्री आउँदा के–के विषयमा सहमति भयो स्पष्ट पारिएन । यसैले सहमति भएका विषयमा स्पष्ट पार्न माग गरेका छौं ।’ 

पोखरेलले नेपालको बजेटलाई कमजोर पार्ने विदेशी सहयोग स्वीकार्न नहुनेमा पनि सरकारको ध्यानाकर्षण गराएको छ । ‘नेपालको बजेटलाई कमजोर पार्ने काम हुनु हुँदैन । वैदेशिक सहायता बजेट प्रणालीमा पर्नुपर्छ,’ पोखरेलले भने । 

सर्लाहीको बरथहवामा एक जनाको ज्यान जानेगरी भएको घटनाप्रति पनि आफूले गम्भीर चासो व्यक्त भएको एमालेले जनाएको छ । 

‘सर्लाहीको बरथहवामा हाम्री मेयर कल्पनाकुमारी कटवाल नगर अस्पतालको क्षमता विस्तारबारे गर्न लागेको छलफलमा सत्तापक्षका कार्यकर्ताले हुलदंगा गरे । प्रहरीले बल प्रयोग गर्दा एक जनाको मृत्यु भएको छ,’ पोखरेलले भने, ‘सत्तापक्षबाटै अराजकता देखाइयो । सर्लाही घटनाको क्षतिप्रति दुःख व्यक्त गर्दै यसपछिको अवस्थालाई तत्काल नियन्त्रण गर्न जनताको जिउधनको सुरक्षा गर्न हामी सरकारसँग माग गर्दछौं ।’

एमालेको केन्द्रीय सदस्यमा ६ जना मनोनीत [नामसहित]