नेपाली कांग्रेसका वरिष्ठ नेता डा. शेखर कोइरालाले प्रधानमन्त्रीबाटै शहीदहरूको अवमूल्यन भएको आरोप लगाएका छन् ।​​

मंगलवार विराटनगरमा 'समुदायमा कांग्रेस' अभियानको शुरूवात गर्दै नेता कोइरालाले प्रधानमन्त्री पुष्पकमल दाहाल 'प्रचण्ड'बाटै शहीदको अवमूल्यन हुने काम भएको बताएका हुन् ।

‘प्रधानमन्त्रीजीले ३ हजार थप शहीद थप्ने कुरा गर्नुभयो । शहीद दिवसका दिन हामीले शहीदहरूलाई अवमूल्यन गर्न भएन । त्यो कुरामा ध्यान दिन आवश्यक छ’, उनले भने ।

प्रजातन्त्रका निम्ति बलिदानी दिएका शहीदहरूको अवमूल्यन गर्न नहुने उनले बताए ।

‘शहीद दिवसका दिन हामीले शहीदको अवमूल्यन गर्नु भएन । त्यसमा ध्यान दिनु आवश्यक छ', उनले भने, 'शहीदको वास्तविक परिभाषालाई अंगीकार गरी अघि बढ्दा शहीदहरूप्रति सच्चा श्रद्धाञ्जली हुन्छ भन्ने मलाई लाग्छ । शहीदको संख्या थप्दै गर्दा शहीदकै अपमान हुने बुझेको छु ।’ 

प्रधानमन्त्री प्रचण्डले यही माघ १३ गते काठमाडौंमा आयोजित एक कार्यक्रममा करिब ३ हजारलाई छिट्टै शहीद घोषणा गर्ने अभिव्यक्ति दिएका थिए । ​

कार्यक्रममा नेता कोइरालाले कांग्रेस समुदायमा पुगेर जनभावना बुझ्न अघि बढेको उल्लेख गरे । समुदायस्तरमा देखिएका कमीकमजोरीलाई आत्मसात गर्दै सच्चिएर कांग्रेस अघि बढ्नुपर्ने उनको भनाइ थियो ।

उनले विराटनगरमा शुद्ध खानेपानीलाई प्रभावकारीरुपमा जनतामाझ पुराउन महानगरले काम गर्दै आएको बताए ।

जापानको सहयोगी संस्था जाइकाले महानगरभित्र विच्छाएको खानेपानीको पुरानो पाइप विस्थापित गर्दै नयाँ पाइप लगाउने कार्य अघि बढेको उल्लेख गरे ।​​​​

त्यसैगरी, सुकुम्बासी र सिंघिया खोलाको तटबन्धको समस्याबारे उठेको जिज्ञासा नेता कोइरालाले सिंघिया खोलामा अस्थायी तटबन्ध बन्ने उनले बताए ।

‘प्रदेश सरकारले यस क्षेत्रमा कोरिडोर निर्माण गर्नेछ । यसका लागि ठूलो बजेट लाग्ने र समय लाग्ने हुँदा अब केही समय धैर्य गरिदिन आग्रह छ’, उनले भने ।