मोरङमा शाैच गर्न गएकी किशोरीको बीभत्स हत्या

मोरङमा एक किशोरीको हत्या भएको छ । पथरीशनिश्चरे नगरपालिका–७ लामाटोलीमा १५ वर्षकी किशोरी ज्ञानमति कुलुङ राईको धारिलो हतियार प्रयोगगरी हत्या भएको प्रहरीले जनाएको छ ।

खोटाङ घर भएकी १५ वर्षीया राई मामाको छोरासँग विनोद राईको घरमा बस्दै आएकी थिइन् । उनी पथरीशनिश्चरे–१ मा रहेको पञ्चायत माध्यमिक विद्यालयको कक्षा ७ मा अध्ययन गर्थिन् । 

सोमबार राति करिब १० बजेतिर शौचालय जाने क्रममा उनीमाथि धारिलो हतियार प्रहार भएको मोरङ प्रहरीका प्रवक्ता डीएसपी रन्जनकुमार दाहालले जानकारी दिए । ‘उनी सुत्ने कोठाको पछाडिपट्टी शौचालय रहेछ,’ दाहालले भने, ‘तर, उनी शौचालय नै नपुगी पछाडिबाट धारिलो हतियार प्रहार गरेर हत्या गरेको देखिन्छ ।’

हतियार प्रहारबाट गर्धन, अनुहार र दाहिने पाखुरामा गहिरो चोट लागेको दाहालले जानकारी दिए । राति नै मोरङ प्रहरी प्रमुख एसपी नवराज कार्की सहितको टोली घटनास्थल पुगेको छ । तालिमप्राप्त कुकुरसहित घटनास्थल पुगेर अनुसन्धान थालेको प्रहरीले जनाएको छ ।

‘शौचालय जाने क्रममा चिच्याएको आवाज आएपछि हेर्दा एउटा मान्छे भागेजस्तो देखियो भनेर परिवारका सदस्यले भनेका छन्, ‘उनले भने, ‘रातिदेखि नै एसपी सा‘बसहितको टोली पुगेर अनुसन्धान गरिरहेको छ । थप अनुसन्धानपछि खुल्ला ।’ 

अहिले विभिन्न कोणबाट अनुसन्धान थालिएको प्रहरीले जनाएको छ । ‘मृतक किशोरीको ब्वाइफ्रेन्ड पनि थियो भन्ने सुनेका छौं,’ डीएसपी दाहालले भने, ‘घर परिवारमाथि पनि अनुसन्धान बढाएका छौं । तर, अहिले नै यही हो भन्ने अवस्थामा छैन ।’ उनको घरतिर पनि पारिवारिक रूपमा समस्या रहेको बुझिएको उनले बताए ।

घटनास्थलबाट शव उठाएर पोस्टमार्टमका लागि बीपी कोइराला स्वास्थ्य विज्ञान प्रतिष्ठान धरान पठाइएको प्रहरीले जनाएको छ । पोस्टमार्टम रिपोर्ट आएपछि घटनाबारे थप प्रस्ट हुने उनले बताए । मृतक किशोरी हिजो दिउँसो घरमै रहेकाले उनको मोबाइल फोन चेक गर्ने काम भइरहेको पनि प्रहरीले जनाएको छ ।