भारतको पिथौरागढका बेरोजगार युवालाई दुलही पाउनै कठिन, विवाहका लागि नेपाल आउन थाले

पछिल्लो समय भारतको पिथौरागढका बेरोजगार युवा आफ्नै देशमा दुलही पाउन कठिन भएपछि विवाहका लागि नेपाल आउन थालेका छन् । बेरोजगारीका कारण आफ्नै देशमा दुलही पाउन नसकेपछि दुलही खोज्दै भारतीयहरू नेपाल आएन थालेका हुन् । 

पिथौरागढका महेन्द्र सिंहले छोराको विवाहका लागि कैयौँ गाउँ घुमे पनि नोकरी नभएकाले कसैले छोरी दिन नमानेको बताए । बैतडीबाट भने छोराको विवाह गरेको उनले बताए । 

पिथौरागढकी विमला देवीले पनि बेरोजगार छोरालाई भारतमा कसैले दुलही दिन नमानेका कारण बैतडी र दार्चुला पुगेको सुनाइन्। 

नेपालको गरिबी र भारतीय युवाको बेरोजगारीले अन्तरदेशीय वैवाहिक सम्बन्ध बढ्न थालेको भारतीय सञ्चारमाध्यमले विश्लेषण गरेका छन् । 

नेपाल–भारतबीच हुने विवाहको अभिलेख दुवै देशका सुरक्षाकर्मीले राख्ने गरेका छन् । भारतीय सीमा सुरक्षा बलका झुलाघाट पुल इन्चार्ज अनुप मन्नाले नेपाली र भारतीयबीच पछिल्लो समय विवाह बढेको बताए ।

शिक्षित र खान लगाउन पुग्ने सबै नेपालीले भारतीयलाई छोरी दिने गरेका छैनन् । आर्थिक रूपमा विपन्न परिवार मात्र विवाहका लागि तयार हुने गरेको दशरथचन्द नगरपालिका–८, झुलाघाटका जयसिंह भाटले बताए । आजको गोरखापत्र दैनिकमा खबर छ ।