संघीय संसद्का दुवै सदनको बैठक बस्दै, नीति तथा कार्यक्रम पारित गर्ने सम्भावित कार्यसूची

आज संघीय संसद्का दुवै सदनको बैठक बस्दैछ । प्रतिनिधिसभाको बैठक बिहान ११ बजे तथा राष्ट्रियसभाको बैठक साढे ११ बजेका लागि बोलाइएको हो । 

जेठ १ गते संयुक्त सदनको बैठकमा प्रस्तुत भएको सरकारको नीति तथा कार्यक्रममाथिको छलफललाई आजको बैठकमा अघि बढाउने सम्भावित कार्यसूचीमा उल्लेख छ । आजका लागि डाकिएको दुवै बैठकमा सरकारको नीति तथा कार्यक्रममाथिको छलफल सकेर त्यसलाई पारित गर्ने कार्यसूची छ ।

नीति कार्यक्रममाथिको छलफलको क्रममा उठेका प्रश्नको प्रधानमन्त्री पुष्पकमल दाहाल प्रचण्डले जवाफ दिएपछि पारित गर्ने कार्यसूची संसद् सचिवालयले बनाएको छ । यस्तै, प्रतिनिधिसभाको आजको बैठकमा अर्थमन्त्री वर्षमान पुनले आगामी आर्थिक वर्ष २०८०-८१ को आर्थिक सर्वेक्षण पेश गर्नेछन् । उनले बैंक तथा वित्तीय संस्थासम्बन्धी पहिलो संशोधन विधेयक २०८० माथि विचार गरियोस् भन्ने प्रस्तावसमेत प्रस्तुत गर्ने कार्यसूचीमा उल्लेख छ । 

कानून न्याय तथा संसदीय मामिलामन्त्री पदम गिरीले राष्ट्रियसभामा उत्पति भएको विधायनसम्बन्धी विधेयक विधेयक २०८० माथि विचार गरियोस् भन्ने प्रस्ताव प्रस्तुत गर्दैछन् । 

बैठकको शुरूमा सभामुखले प्रधानमन्त्री तथा मन्त्रिपरिषद्को कार्यालयबाट प्राप्त कार्यभार थपसम्बन्धी पत्रको व्यहोरा पढेर सुनाउने र प्रतिनिधिसभा नियमावली, २०७९ को नियम १० बमोजिम बैठकको अध्यक्षता गर्ने सदस्यहरूको मनोनयन गर्नेछन् । 

दिउँसो बस्ने राष्ट्रियसभामा पनि नीति तथा कार्यक्रममाथि छलफल हुनेछ । प्रधानमन्त्री प्रचण्डले  राष्ट्रपतिबाट जेठ १ गते संघीय संसद्को दुवै सदनमा गरेको संयुक्त बैठक सम्बोधनमा उल्लेखित आर्थिक वर्ष २०८१-८२ का लागि नेपाल सरकारको नीति तथा कार्यक्रममाथिको छलफल गरियोस् भन्ने प्रस्ताव प्रस्तुत गर्नेछन् । 

उनले नै सरकारको नीति तथा कार्यक्रममाथिको छलफलको क्रममा उठेका प्रश्नहरूको जवाफ दिइसकेपछि अध्यक्षले आर्थिक वर्ष २०८१-८२ का लागि नेपाल सरकारको नीति तथा कार्यक्रममाथि पेस भएको संशोधन प्रस्तावलाई निर्णयार्थ प्रस्तुत गर्ने सम्भावित कार्यसूचीमा राखिएको छ ।

प्रतिपक्षी दल नेपाली कांग्रेसको अवरोधबीच नीति तथा कार्यक्रम पारित गर्ने तयारी गरेको सरकार शुक्रबार मुठभेडबाट पछि हटेको थियो । 

कांग्रेसले सरकारी ठगी प्रकरणमा गृहमन्त्री लामिछाने दोषी रहेको भन्दै उनीमाथि संसदीय छानबिनको माग गर्दै आएको छ । यसले गर्दा संसदमा अवरोध हुँदै आएको छ । अवरोधकै बीच प्रधानमन्त्री प्रचण्डले विश्वासको मत लिएका थिए । 

सहकारी ठगी प्रकरण छानबिनका लागि गठन गरिने संसदीय छानबिन समितिको कार्यादेश (टीओआर) टुङ्गो लगाउन प्रमुख राजनीतिक दलका शीर्ष नेताहरूबीचको बैठक आज (आइतबार) बिहान बस्दैछ । शनिबारको बैठकमा उक्त विषयमा टुङ्गो लाग्न नसकेपछि बैठक आइतबार बस्ने तय भएको हो ।

यसमा सहमति जुटे आजै सरकारको नीति तथा कार्यक्रम पारित हुने सम्भावना छ ।