१७ वर्षको प्रतीक्षापछि भारतले जितेको अर्को टी–२० विश्वकप

अर्को टी–२० क्रिकेट विश्वकप जित्नका लागि भारतले १७ वर्ष कुर्नुपरेको छ । सन् २००७ मा पहिलो पटक टी–२० विश्वकपको आयोजना भएको थियो । त्यसको उपाधि भारतले जितेको थियो । त्यो पनि प्रमुख प्रतिद्वन्द्वी पाकिस्तानलाई हराएर । दक्षिण अफ्रिकामा भएको उक्त खेलमा भारतले पाकिस्तानमाथि ५ रनको रोमाञ्चक जीत निकालेको थियो ।

त्यसयता थप ७ वटा टी–२० विश्वकप भए तिनमा फाइनलमा पुगेर पनि भारत चुक्ने गरेको थियो ।  तर अहिले अवस्था फेरिएको छ । शनिबार राति उपाधि जितेपछि भारतकाे अवस्था फेरिएको हो ।

अर्को कुरा  टी–२० विश्वकपमा भारतका लागि दक्षिण अफ्रिका एउटा संयोग बनेको छ । किनकि, उसले दक्षिण अफ्रिकालाई नै ७ रनले हराएर शनिवार दोस्रो उपाधि जितेको छ । अब भारतका दुईवटा टी–२० विश्वकप उपाधिमा कहीँ न कहीँ दक्षिण अफ्रिका जोडिने भएको छ । पहिलो उपाधि दक्षिण अफ्रिकामा र दोस्रो उसैलाई हराएर जितेकाे संयोगले गर्दा ।  

बार्बाडोसमा भएको फाइनलमा भारतसँग पराजित भएसँगै दक्षिण अफ्रिकाको भने पहिलो पटक विश्वकपको उपाधि जित्ने सपना चकनाचुर बनेको छ ।

भारतले दिएको १७७ रनको लक्ष्य पछ्याउने क्रममा दक्षिण अफ्रिकाले निर्धारित २० ओभरमा ८ विकेटको क्षतिमा १६९ रन मात्र बनाउन सक्यो । 

दक्षिण अफ्रिकाका लागि हेनरिच क्लासेनले अर्धशतकीय पारी खेले । २७ बलको सामना गर्दै २ चौका र ५ छक्का प्रहार गर्दै ५२ रनको योगदान दिए । 

यसैगरी क्विन्टन डी ककले ३१ बलमा ३९ रन, ट्रिस्टन स्टब्सले २१ बलमा ३१ रनको योगदान दिँदा डेभिड मिलरले १७ बलमा २१ रन बनाए । दक्षिण अफ्रिकाका ब्याटरले जीतका लागि निकै संघर्ष गरेपनि केही जोर चलेन । पछिल्ला ओभरमा भारतीय बलरसामु उनीहरू निरीह सावित भएका थिए । भारतका लागि हार्दिक पाण्ड्याले सर्वाधिक ३ विकेट लिए ।

यसअघि टस जितेर पहिले ब्याटिङ गरेको भारतले निर्धारित २० ओभरको खेलमा ७ विकेट गुमाउँदै रन १७६ बनाएको थियो । 

भारतको विशाल लक्ष्य बनाउने क्रममा विराट कोहलीले उत्कृष्ट प्रदर्शन गरे । उनले ५९ बलको सामना गर्दै टीमका लागि अर्धशतकीय पारी खेल्दै ७६ रनको योगदान दिए । कोहली फाइनलका उत्कृष्ट खेलाडी चुनिए । 

जसमा ६ चौका र २ छक्का समेत समावेश थियो । यसअघि खासै चल्न नसकेका कोहलीले फाइनलमा भने उत्कृष्ट प्रदर्शन गर्दै भारतका लागि सम्मानजनक स्कोर बनाएका हुन् । 

यस्तै कप्तान रोहित शर्मा मात्र ९ रन बनाएर पभेलियन फर्किए भने ऋषभ पन्त शून्य रनमा आउट भए । 

यस्तै सूर्यकुमार यादव पनि ३ रन जोडेर आउट हुँदा अक्षर पटेलले भने ४७ रन बनाए । शिवम दुवेले २७ रन जोडे ।

दक्षिण अफ्रिकाका लागि केशव महाराज र एनरिच नोर्टजेले २–२ विकेट लिए । त्यस्तै, मार्को यानसेन र कागिसो रबाडाले १–१ विकेट हात पारे ।

विजेता टोली भारतका तीव्र गतिका बलर जसप्रित बुमराह आईसीसी टी–२० विश्वकप २०२४ को सर्वोत्कृष्ट खेलाडी चुनिए । सबै खेल जित्दै भारत विजेता हुँदा बुमराहले प्रतियोगिताभर निर्णायक प्रदर्शन गरेका थिए । यस क्रममा उनले १५ विकेट लिए ।

बुमराहले प्रतियोगिताभर ८ खेलमा ४.१७ को इकोनमीमा बलिङ गरे । उनले आयरल्यान्ड, बंगलादेश, दक्षिण अफ्रिका र इंग्ल्यान्डसँग २–२ विकेट लिएका थिए । 

यस्तै उनले अफगानिस्तान र पाकिस्तानसँग ३–३ तथा अस्ट्रेलियासँग १ विकेट हात पारे । 

फाइनलमा बुमराहले ४ ओभरमा १८ रन खर्चेर महत्वपूर्ण २ विकेट लिएका थिए ।